जळगाव-भुसावळ महामार्गावर अज्ञात वाहनाच्या धडकेत कोरपावली येथील तरुण ठार

यावल (14 नोव्हेंबर 2024) : यावल तालुक्यातील कोरपावली येथील दोन तरुण दुचाकीद्वारे जळगाव येथून भुसावळला येत असताना महामार्गावर त्यांच्या दुचाकीला अज्ञात वाहनाने धडक दिली. या अपघातामध्ये 21 वर्षीय तरुण हा जागीच ठार झाला तर 23 वर्षीय तरुण हा गंभीर जखमी आहे. हा अपघात 11 नोव्हेंबर रोजी मध्यरात्री घडला. याप्रकरणी नशिराबाद पोलीस ठाण्यात अपघाताची तक्रार देण्यात आली.

जागीच तरुण ठार
कोरपावली, ता.यावल येथील रहिवासी राहुल संतोष सोनवणे (21) व दीपक उर्फ देवेंद्र दत्तू तायडे (23) हे दोन्ही 11 नोव्हेंबर रोजी रात्री दुचाकी (क्रमांक एम. एच.19 ई.एल. 4097) द्वारे जळगावकडून भुसावळकडे येत असताना महामार्गावरील गोदावरी हॉस्पिटलजवळ एका अज्ञात वाहनाने त्यांना धडक दिली. या अपघातामध्ये राहुल सोनवणे हा तरुण जागीच ठार झाला तर दीपक उर्फ देवेंद्र तायडे हा गंभीर जखमी झाला. अपघातानंतर जखमी तरूणावर गोदावरी हॉस्पिटलमध्ये उपचार सुरू आहे. अपघाताबाबत नशिराबाद पोलीस ठाण्यात अपघाताची तक्रार नोंदविण्यात आली. अपघातामुळे कोरपावली गावात शोककळा पसरली आहे.