धुळे गुन्हे शाखेची मोठी कारवाई : राजस्थाननिर्मित दारूची ‘पुष्पा स्टाईल’ वाहतूक रोखली : 42 लाखांचा मुद्देमाल जप्त
मेंढ्यांच्या लोकराआड प्रतिबंधीत मद्याची वाहतूक : राजस्थानच्या चालक-वाहकाला बेड्या
Dhule Crime Branch’s big operation : ‘Pushpa Style’ traffic of Rajasthan-made liquor stopped: 42 lakhs seized धुळे (16 नोव्हेंबर 2024) : राजस्थान राज्यात निर्मित व विक्रीला परवानगी असलेल्या दारूची कंटनेरमध्ये छुपा कप्पा बनवून वाहतूक होत असताना धुळे गुन्हे शाखेने कारवाई करीत 20 लाख 16 हजार रुपये किंमतीची विदेशी दारू जप्त केली. शनिवार, 16 नोव्हेंबर रोजी ही कारवाई करण्यात आली. ‘पुष्पा’ स्टाईल होणारी मद्याची वाहतूक पाहून अधिकारीदेखील अवाक झाले. डाक पार्सलच्या या कंटेनरमध्ये मेंढीच्या लोकराआड दारूची वाहतूक होत असल्याचे व राजस्थानमधील दारू पालघरकडे नेली जात असल्याचे स्पष्ट झाले असून चालक व क्लीनरला अटक करण्यात आली.
गोपनीय माहितीवरून कारवाई
धुळे गुन्हे शाखेचे पोलीस निरीक्षक श्रीराम पवार यांना मद्याची चोरटी वाहतूक होणार असल्याची माहिती मिळाल्यानंतर त्यांनी कारवाईच्या सूचना केल्या. पिंपळनेरजवळील उंबाठा चौफुलीवर कंटेनर (आर.जे.32 जी.ए.5956) आल्यानंतर तपासणी केली असता चालकाने लोकराची वाहतूक करीत असल्याचे सांगितले मात्र पथकाला संशय असल्याने पथकाने कंटेनरची बारकाईने तपासणी केल्यानंतर चालकाच्या शीटमागे लागलेल्या सनमाईकामध्ये दोन बाय दोनची खिडकी आढळली व तिची तपासणी केली असता छुप्या कप्प्यात राज्यात प्रतिबंधीत विदेशी मद्य व बिअरचे कॅन आढळले.
42 लाखांचा मुद्देमाल जप्त : दोघांना बेड्या
एक लाख 20 हजार रुपये किंमतीचे ब्लेंडर प्राईड दारू, दोन लाख 79 हजार रुपये किंमतीची एटपीएम दारू तसेच सहा लाख सात हजार 200 रुपये किंमतीची विदेशी दाूरू, चार लाख 41 हजार 600 रुपये किंमतीचे ग्रीन लेबल दारू, एक लाख 93 हजार 200 रुपये किंमतीचे ग्रीन लेबल दारू, तीन लाख 75 हजार रुपये किंमतीची विदेशी बिअर, 22 लाख रुपये किंमतीचा कंटेनर व मेंढीचे लोकर मिळून 42 लाख 16 हजारांचा मुद्देमाल जप्त करण्यात आला. कंटेनर चालक सोहनलाल चौथमल प्रजापती (57, कुकरखेडा, राजसमन्द, कुकरखेर, राजस्थान) व क्लीनर दौलतसिंह मोहनसिंह राजपूत (34, मंडावर, राजसमन्द, राजस्थान) अशी अटकेतील आरोपींची नावे आहेत.
यांनी केली कारवाई
ही कारवाई धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे, धुळे गुन्हे शाखेचे पोलीस निरीक्षक श्रीराम पवार यांच्या मार्गदर्शनाखाली सहाय्यक निरीक्षक श्रीकृष्ण पारधी, उपनिरीक्षक अमरजीत मोरे, संजय पाटील, पवन गवळी, आरीफ पठाण, पंकज खैरमोडे, हवालदार सदेसिंग चव्हाण, मयूर पाटील, कमलेश सूर्यवंशी, गुणवंत पाटील, चालक राजीव गीते आदींच्या पथकाने ही कारवाई केली.
