राजकीय नाराजी नाट्यावर पडदा : एकनाथ शिंदे उपमुख्यमंत्रीच

Political discontent puts an end to the drama : Eknath Shinde is the Deputy Chief Minister मुंबई (5 डिसेंबर 2024) : 12 दिवसांपासून महाराष्ट्राच्या राजकारणात भाजपा सर्वात मोठा पक्ष ठरल्यानंतर मुख्यमंत्री भाजपाचाच होणार हे मानलं जात होतं. पण महायुतीकडून अधिकृतरीत्या जाहीर केलं जात नव्हतं. दोन दिवसांपूर्वी देवेंद्र फडणवीस यांच्या मुख्यमंत्रीपदावर शिक्कामोर्तब झालं. अजित पवार उपमुख्यमंत्रीपदाची शपथ घेतील हेही नक्की झालं. पण एकनाथ शिंदे यांच्याबाबत संदिग्धता कायम होती दोन दिवसांपासून चाललेल्या भेटीगाठी, बैठका आणि राजकीय नाट्यावर अखेर पडदा पडला. एकनाथ शिंदे यांनी उपमुख्यमंत्रीपद स्वीकारण्याचं मान्य केलं

आमच्या विनंतीला मान ; आमदार सामंत
सायंकाळी साडेपाच वाजता पंतप्रधान नरेंद्र मोदींच्या उपस्थितीत मुख्यमंत्री व दोन्ही उपमुख्यमंत्र्यांचा शपथविधी झाला. आम्ही शिवसेनेच्या वतीने सर्वच आमदारांनी एकनाथ शिंदेंना विनंती केली होती की कोणत्याही स्थितीत त्यांनी उपमुख्यमंत्री व्हायला हवं. शिवसेना आमदार, शिवसैनिक, महायुतीचे आमदार व देवेंद्र फडणवीसांनी केलेली विनंती याला मान देऊन एकनाथ शिंदेंनी उपमुख्यमंत्रीपद घ्यायचं मान्य केलं. आम्ही फडणवीसांना भेटण्यासाठी सागर बंगल्यावर आलो होतो. त्यांच्याकडून एकनाथ शिंदेंच्या उपमुख्यमंत्रीपदाच्या शिफारसीचं पत्र त्यांनी दिलं. ते आम्ही आता राजभवनावर येऊन प्रधान सचिव प्रवीण दराडे यांच्याकडे सुपूर्द केलं आहे, असं आमदार उदय सामंत यांनी सांगितलं.

कोंडी नव्हतीच
या प्रक्रियेत कोंडी अजिबात नव्हती. देवेंद्र फडणवीस असो किंवा आम्ही असोत, शिवसेनेचे पदाधिकारी-खासदार असोत, सगळ्यांची इच्छा होती की एकनाथ शिंदेंनी सरकारमध्ये असणं आवश्यक होतं. एकनाथ शिंदेंनी संघटन प्रमुख म्हणून, पक्षप्रमुख म्हणून महाराष्ट्रभर फिरून पक्षाचं काम करायचं आणि इतर कुणालातरी संधी द्यायची हा विचार केला होता. पण हे आम्हाला मान्य नाही असं आम्ही त्यांना सांगितलं. ते उपमुख्यमंत्री व्हायला हवेत, ही प्रत्येक शिवसैनिकाची इच्छा होती. ती एकनाथ शिंदेंनी पूर्ण केली त्याबद्दल आम्ही आभारी आहोत, असंही उदय सामंत म्हणाले.

खातेवाटप किंवा मंत्रीपदावर तिन्ही नेते एकत्र बसून योग्य प्रकारे सोडवतील. त्यात वेगळं चित्र निर्माण करण्याची कुणाचीही इच्छा नाही. हेदेखील स्वत: एकनाथ शिंदेंनी सांगितलं आहे, अशा शब्दांत उदय सामंत यांनी मतभेदांवर स्पष्टीकरण दिलं आहे.