धुळे पोलिसांची कामगिरी : तरुणीचे फोटो व्हायरल करणार्‍या उमराणेतील आरोपीला अटक
Dhule Police Performance : Accused from Umrane arrested for making young woman’s photo viral धुळे (30 डिसेंबर 2024) : सोशल मिडीयावरून झालेल्या ओळखीनंतर नाजूक संबंध निर्माण झाल्यानंतर तरुणीवर अत्याचार करण्यात आला व तरुणीचे अश्लील फोटो काढून नंतर ते व्हायरल केल्याप्रकरणी गीतेश राजेंद्र पाटील (21, रा.उमराणे, ता.देवळा, जि.नाशिक) या तरुणाला धुळ्यातील पोलिसांनी बेड्या ठोकल्या.
असे आहे नेमके प्रकरण ?
18 वर्षीय मुलीच्या तक्रारीनुसार सोशल मीडियावर संशयीताशी ओळख झाली होती. या ओळखीनंतर गीतेशने तरुणीला शिरपूर येथील एका लॉजवर नेले. तेथे त्याने तिचे अश्लील फोटो व व्हिडिओ काढले. गीतेश व तरुणीत वाद झाला. त्यानंतर त्याने सोशल मीडियावर बनावट अकाउंट तयार करून तरुणीचे फोटो व व्हिडिओ व्हायरल केले. त्यामुळे तरुणीने तीन वेळेस आत्महत्येचा प्रयत्न केला. तसेच गीतेशने पैशांची मागणी केल्याची तक्रार तरुणीने दिली आहे. त्यानुसार गीतेशच्या विरोधात सायबर पोलिस ठाण्यात गुन्हा दाखल झाला. पोलिसांनी गीतेशला अटक केली. न्यायालयाने त्याची 30 डिसेंबरपर्यंत पोलिस कोठडीत रवानगी केली. पोलिस अधीक्षक श्रीकांत धिवरे व अप्पर पोलिस अधीक्षक किशोर काळे यांनी चौकशीची आदेश दिले होते. सायबर पोलिस ठाण्याचे पोलिस निरीक्षक सुरेश घुसर यांच्या पथकाने कारवाई केली.
तरुणीकडून केली पैशांची मागणी
तरुणीला संशय आल्यावर तिने गीतेशला याबाबत विचारणा केली होती मात्र त्याने कानावर हात ठेवले. शिवाय मी स्वत: फोटो व्हायरल करणार्‍याचा शोध घेईल, असे सांगितले. खरा प्रकार समोर आल्यावर गीतेशने एका मोठ्या ग्रुपचे नाव सांगून मी त्या ग्रुपचा सदस्य आहे, कोणाला घाबरत नाही, असा दम भरून पैशांची मागणी केली होती.
