मोहाडी पोलिसांची मोठी कामगिरी : धुळ्यातील लग्न समांरभातून 16 लाखांचे चोरलेले दागिणे जप्त : चोरटे मात्र पसार
मध्यप्रदेशातील गुलखेडीतील टोळी रडारवर : चौघांविरोधात गुन्हा
Big achievement by Mohadi police : Stolen jewellery worth Rs 16 lakhs seized from a wedding ceremony in Dhule : Thieves on the run धुळे (30 डिसेंबर 2024) : धुळ्यातील लग्न समारंभात धार्मिक विधी सुरू असताना अल्पवयीन चोरट्याने नवविवाहितेचे सुमारे 16 लाख रुपये किंमतीचे व 26 तोळे वजनाचे दागिणे लांबवले होते. 2 डिसेंबर रोजी मोहाडी हद्दीततील हॉटेल कृष्णा रिसोर्टमध्ये ही घटना घडली होती. मोहाडी पोलिसांनी अशा पद्धत्तीने गुन्हे करणारी टोळी मध्यप्रदेशातील राजगढ जिल्ह्यातील बोडा पोलीस ठाणे अंतर्गत सांसीकढीया, गुलखेडी येथील असल्याचे निष्पन्न करीत छापा टाकला मात्र संशयीत पसार झाले. आरोपींच्या झोपडीवजा घरातून चोरी केलेले 16 लाखांचे दागिणे जप्त करण्यात आले.
असे आहे दागिणे चोरी प्रकरण
2 डिसेंबर 2024 रोजी तक्रारदार प्रतिभा राजेंद्र बोरसे यांची कन्या सलोनी राजेंद्र बोरसे हिच्या लग्नानंतर रात्री 9.15 वाजता धुळे शहरातील हॉटेल कृष्णा रिसॉर्टमध्ये श्रीमंती पूजनासह संगीत कार्यक्रम सुरू असताना प्रतिभा बोरसे यांच्या पर्समधून सोन्याचा पोहे हार, नेकलेस, सोन्याचे काप, बांगड्या, तिन चैन, टाप्स, इतर सोन्याचे दागिने, रोख रुपये व मोबाईल असे एकूण 15 लाख 98 हजारांचा ऐवज अल्पवयीन चोरटा व त्याच्या साथीदाराने लांबवला. याप्रकरणी मोहाडी पोलिसात गुन्हा दाखल करण्यात आला.
नऊ दिवस पाळत मात्र चोरट्यांचा गुंगारा
मोहाडी निरीक्षक शशिकांत पाटील यांना नंदुरबार जिल्ह्यातील शहादा व अकोला जिल्ह्यातही अशाच पद्धत्तीने गुन्हा घडल्याचे व चोरीची पद्धत एकच असल्याने त्यांनी पथकाला निर्देश दिले. लग्न समारंभात चोरी करणारी टोळी मध्यप्रदेश राज्यातील राजगढ जिल्ह्यातील बोडा पोलीस ठाणे अंतर्गत सांसीकढीया, गुलखेडी येथील असल्याची माहिती कळताच पथकाने धाव घेतली. विशेष पथकाने तब्बल नऊ दिवस पाळत ठेवल्यानंतर संशयीत गौरव बबलू सांसी, सावंत ऊर्फ चप्पू भारतसिंग सांसी, कालू गोली सांसी, बबलू सुमेर सिसोदिया (राहणार हुलखेडी, गुलखेडी, ता.पचोड, जि.राजगढ) निष्पन्न केले मात्र आरोपी जंगलात झोपडी करून वास्तव्य करीत असल्याने बोडा पोलिसांच्या मदतीने पथक गेल्यानंतर आरोपी पसार झाले मात्र त्यांच्या झोपडीतून 26 तोळे सोन्याचा मुद्देमाल हा जप्त करण्यात आला.
यांनी केली कारवाई
ही कारवाई धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे, उपविभागीय पोलीस अधिकारी राजकुमार उपासे यांच्या मार्गदर्शनाखाली मोहाडी पोलीस निरीक्षक शशिकांत पाटील, पोलीस उपनिरीक्षक अशोक पायमोडे, प्रकाश जाधव, मनीष सोनगीरे यांच्या पथकाने केली. तपास अशोक पायमोडे करीत आहेत.
