धुळे गुन्हे शाखेची मोठी कामगिरी : चोरीच्या नऊ दुचाकींसह चोरटा जाळ्यात
दोन गुन्ह्यांची उकल : दुचाकी मालकांना चेचीस क्रमांकावरून ओळख पटवण्याचे आवाहन
Dhule Crime Branch’s big achievement: Thief caught with nine stolen bikes धुळे (16 जानेवारी 2025) : धुळे स्थानिक गुन्हे शाखेने गोपनीय माहितीच्या आधारावर अट्टल दुचाकी चोरट्याला अटक केली असून त्याच्या ताब्यातून चोरी केलेल्या नऊ दुचाकी जप्त करण्यात आल्या. दोन दुचाकी चोरीबाबत नाशिकसह धुळ्यात गुन्हा दाखल असून उर्वरीत सात दुचाकींबाबत चेचीस व इंजिन क्रमांकावरून मूळ मालकांना ओळख पटवण्याचे आवाहन यंत्रणेने केले आहे. अल्ताफ मुक्तार कुरेशी (21, दंडेवाला बाबा नगर, मोहाडी उपनगर, धुळे) असे अटकेतील आरोपीचे नाव आहे तर आरोपीचा साथीदार पसार झाला आहे.
गोपनीय माहितीवरून कारवाई
धुळ्यातील संदीप अमृत चौधरी (प्रभात नगर, देवपूर, धुळे) यांची दुचाकी (एम.एच.12 एफ.क्यू.2170) ही 5 ऑक्टोबर 2024 रोजी चोरी गेल्यानंतर देवपूर पोलिसात गुन्हा दाखल होता. हा गुन्हा संशयीत अल्ताफने केल्याची माहिती धुळे गुन्हे शाखेचे वरिष्ठ निरीक्षक श्रीराम पवार यांना मिळाल्यानंतर त्यांनी पथकाला कारवाईचे निर्देश दिले. आरोपीला मोहाडी परिसरातील तिखी भागातून बेड्या ठोकल्यानंतर त्याने धुळ्यातून लांबवलेली दुचाकी काढून दिली तसेच त्याने साथीदार खुशाल उर्फ मनोज अशोक मोकाळ (मोहाडी, जि.धुळे) सोबत चोर्‍या केल्याची कबुली देत चोरी केलेल्या दोन लाख 25 हजार रुपये किंमतीच्या एकूण नऊ दुचाकी काढून दिल्या.
धुळ्यातील देवपूर व इंदिरानगर, नाशिक हद्दीतील दुचाकी चोरीचे गुन्हे उघड झाले मात्र सात दुचाकींबाबत चेचीस क्रमांकावरून खातरजमा केली जात आहे. दरम्यान, आरोपीचा साथीदार मोकाळ हा पसार असून त्याचाही शोध सुरू आहे.
यांनी केली कारवाई
ही कारवाई धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे यांच्या मार्गदर्शनाखाली गुन्हे शाखेचे वरिष्ठ निरीक्षक श्रीराम पवार, एपीआय श्रीकृष्ण पारधी, अमरजीत मोरे, हवालदार मुकेश वाघ, शशीकांत देवरे, प्रशांत चौधरी, धर्मेंद्र मोहिते, सुशील शेंडे, महेंद्र सपकाळ, निलेश पोतदार, राहुल गिरी, कमलेश सूर्यवंशी, हर्षल चौधरी आदींच्या पथकाने केली.
