‘पुष्पक’ एक्स्प्रेसला आग लागल्याच्या अफवेने घेतले 13 प्रवाशांचे बळी : मयत तिघे नेपाळातील रहिवासी
मृतांच्या वारसांना पाच लाखांची मदत जाहीर ः अपघातात 11 प्रवासी जखमी
Rumor of a fire in the ‘Pushpak’ Express claimed the lives of 13 passengers : Three of the deceased are residents of Nepal भुसावळ (22 जानेवारी 2025) : मुंबईकडे निघालेल्या अप लखनऊ-मुंबई पुष्पक एक्सप्रेसच्या कोचचला आग लागल्याच्या अफवेने जनरल कोचमधील काही प्रवाशांनी रेल्वे रूळावर उड्या टाकल्यानंतर डाऊन रेल्वे लाईनवरून येणार्‍या 12627 डाऊन कर्नाटक एक्प्रेसखाली आल्याने 11 प्रवाशांचा घटनास्थळीच तर दोघांचा उपचारादरम्यान मृत्यू झाला होता तर 11 प्रवासी जखमी झाले होते. काळीज पिळवटून टाकणारी ही धक्कादायक घटना पाचोरा तालुक्यातील परधाडे रेल्वे स्थानकाजवळ बुधवार, 22 रोजी सायंकाळी पावणेपाच वाजेच्या सुमारास घडली. दरम्यान, मृतांच्या वारसांना पाच लाखांची मदत मुख्यमंत्र्यांनी जाहीर केली आहे तर मृतांपैकी तिघे नेपाळचे रहिवासी असल्याची माहिती समोर आली आहे.
या प्रवाशांचा ओढवला मृत्यू
जळगाव येथील शासकीय वैद्यकीय महाविद्यालय व रुग्णालयामध्ये एकूण 13 मृतदेह दाखल झाले आहेत. या 13 मृतदेहांपैकी सात मृतदेहांची ओळख पटली आहे. यात 9 पुरुष आणि 3 महिला मयत आहेत. हिंदू नंदराम विश्वकर्मा (11, रा.नेपाळ), लच्छी राम पासी (23, रा.नेपाळ), कमला नवीन भंडारी (43, रा.नेपाळ), जवकला बुट्टे जयगडी (50), नसीरुद्दीन बद्रुद्दीन सिद्दिकी (20 रा.कोंडा), इम्ताज अली (35, रा.गुलऱीहा उत्तर प्रदेश), बाबू खान (30) असे ओळख पटलेल्या मृतांची नावे आहेत तर सहा मृतांची अद्यापही ओळख पटलेली नाही. अनोळखी मृतदेहांची ओळख पटण्यासाठी डीएनचा आधार घेतला जाणार आहे.
मुख्य सुरक्षा आयुक्त आजपासून करणार चौकशी
अपघाताची चौकशी करण्यासाठी मुख्य सुरक्षा आयुक्त आज दौर्‍यावर असून त्यांच्याकडून अपघाताची चौकशी केली जाणार आहे. अपघाताचे प्रमुख कारण, त्यात दोष कुणाचा याची चौकशी सुरक्षा आयुक्त करतील शिवाय दोन्ही गाड्यांचे लोकोपायलट व सहाय्यक लोको पायलट यांची चौकशी होवून जाबजवाब नोंदवण्यात येणार असल्याची माहिती आहे.
आगीच्या अफवेने प्रवाशांनी गमावला जीव
समजलेल्या माहितीनुसार, अप पुष्पक एक्सप्रेस परधाडे स्थानकाजवळून जात असताना रेल्वे रूळांच्या चाकांमधून ठिणग्या उडाल्यानंतर गाडीला आग लागल्याची अफवा प्रवाशांमध्ये पसरली व त्याचवेळी चैन पुलिंग (धोक्याची साखळी आसेढून) करून गाडी परधाडे स्थानकाजवळ थांबवली. अचानक प्रवाशांनी आग, आग म्हणून गोंधळ घालण्यास सुरूवात करताच काही प्रवाशांनी कोचच्या दोन्ही बाजूला उड्या टाकल्या व त्याचवेळी डाऊन ट्रॅकवरून 12627 डाऊन कर्नाटक बंगळूरू-नवी दिल्ली एक्स्प्रेस आल्याने त्या खाली चिरडून 13 प्रवाशांचा मृत्यू झाला तर 11 प्रवासी जखमी झाले.
मृतदेहांचा खच : काळीज पिळवटून टाकणारी दुर्घटना
रेल्वे प्रवाशांनी सुरूवातीला बोगीत आग लागल्याचा भ्रम करून जीव वाचवण्याच्या आकांताने चैन पुलिंग करीत जागेवर गाडी थांबवून पटापट रेल्वे बाहेर उड्या टाकल्या मात्र त्याचवेळी क्रुर काळाने त्यांच्यावर झडप घातली. धावत्या बंगळूरूळ एक्स्प्रेसखाली आल्याने प्रवाशांचे मृतदेहाची तुकडे-तुकडे विखुरले गेले. कुणाचा पाय तर कुणाचा हात तर कुणाचे शरीर वेगवेगळे होवून रेल्वे ट्रॅकवर तसेच रेल्वे खाली विखुरले गेले. रेल्वेतील प्रवाशांमध्ये ही धक्कादायक वार्ता कळताच त्यांच्या गोटात प्रचंड खळबळ उडाली.
जिल्हा प्रशासनाकडून अपघाताची दखल : उपचाराची व्यवस्था
जिल्हा प्रशासनाकडून जखमी व इतर प्रवाशांसाठी नजीकच्या स्थानकांवर तात्पुरती निवासी व्यवस्था करण्यात आली तसेच घटनास्थळावर आठ रुग्णवाहिका, पाण्याचा टँकर तसेच अत्यावश्यक सुविधा उपलब्ध करून देण्यात आल्या तसेच पाचोरा उपविभागीय अधिकार्‍यांना सर्वोतोपरी जखमींना तातडीने उपचार मिळण्यासाठी निर्देश देण्यात आले.
