परधाडेनजीक रेल्वे अपघात : मध्य रेल्वेचे जनरल मॅनेजर धरमवीर मीना यांनी जखमींची घेतली भेट
Train accident near Pardhade पाचोरा (23 जानेवारी 2025) : परधाडेनजीक रेल्वे अपघातात 13 जणांचा बळी गेल्यानंतर मध्य रेल्वेचे जनरल मॅनेजर धरमवीर मीना यांनी मध्यरात्रीच घटनास्थळी भेट दिली. यावेळी त्यांनी टॉर्चच्या उजेडात घटनास्थळ पाहिले. यावेळी भुसावळच्या डीआरएम ईती पाण्डेय उपस्थित होत्या. मीना यांनी पाचोरासह जळगाव व गोदावरीत जावून काही जखमींचीही भेट घेत अपघताची माहिती जाणून घेतली.
रेल्वे अपघातात 13 जणांचा मृत्यू
बुधवार, 22 रोजी दुपारी पावणेपाचच्या सुमारास परधाडे येथे पुष्पक एक्सप्रेस मध्ये आग लागल्याच्या अफेतून प्रवाशांनी गाडी थांबवत उडी घेतल्या हेात्या. त्याचवेळी दुसर्या बाजूने येणार्या आलेल्या कर्नाटक एक्सप्रेसखाली चिरडले जावून 13 जणांचा मृत्यू झाला होता तर 11 प्रवासी जखमी झाले होते.
अपघातानंतर मध्य रेल्वेचे जनरल मॅनेजर धरमवीर मीना हे तातडीने विदर्भ एक्सप्रेसने घटनास्थळी येण्यास रवाना झाले होते. रात्री दीड वाजेच्या सुमारास पाचोरा पासिंग या ठिकाणी उतरून त्यांनी पाचोरा येथील रुग्णालयात भरती असलेल्या जखमींची भेट घेतली. त्यानंतर रात्री घटनास्थळी भेट दिली. त्यानंतर बाय रोड जळगाव येथील शासकीय महाविद्यालय व रुग्णालय या ठिकाणी जखमी असलेल्या रुग्णांबरोबर त्यांनी भेट दिली. गोदावरी रुग्णालयात असलेल्या एका रुग्णाला भेटण्यासाठी ही ते गेले. त्यानंतर थेट भुसावळ येथे येऊन सकाळी 5.30 च्या राजधानी एक्सप्रेसने मुंबईकडे रवाना झाले.
