मुख्यमंत्र्यांच्या भेटीनंतर आमदार खडसेंच्या पुन्हा भाजपात प्रवेशाच्या चर्चा

मुंबई (6 फेब्रुवारी 2025) : दिल्लीत वरीष्ठ नेत्यांच्या उपस्थितीत पक्षात प्रवेश झाला असल्याचे काही महिन्यांपूर्वी आमदार एकनाथराव खडसे यांनी सांगितले मात्र भाजपाने याबाबत कुठलाही दुजोरा न दिल्यानंतर खडसे यांनी आपण शरद पवार यांच्याच पक्षात असल्याचे म्हटले होते. त्यानंतर आता पुन्हा एकदा एका वृत्तवाहिनीने सूत्रांच्या हवाल्याने खडसे यांनी मुख्यमंत्री देवेंद्र फडणवीस यांची भेट घेतली असल्याचे सांगितले असून आमदार खडसे यांचा आता भाजपा प्रवेश होणार? याबाबत चर्चा सुरू झाली आहे.

भाजपात प्रवेशाच्या पुन्हा चर्चा
ज्येष्ठ नेते एकनाथ खडसे हे भारतीय जनता पक्षात प्रवेश करणार असल्याची चर्चा अनेक दिवसांपासून सुरू आहे. लोकसभा निवडणुकीनंतर आपला भारतीय जनता पक्षात प्रवेश झाला असल्याचे त्यांनी स्वतः जाहीर केले होते. मात्र राज्यातील भारतीय जनता पक्षाच्या नेत्यांनी या वृत्ताला दुजोरा दिला नव्हता. त्यामुळे अखेर एकनाथ खडसे यांनी आपण शरद पवार यांच्या सोबतच असल्याचे जाहीर केले होते. त्यांच्या भाजप प्रवेशाच्या चर्चा या आधी देखील अनेकदा समोर आल्या होत्या.

भाजपाच्या भूमिमेकडे लक्ष
एकनाथ खडसे यांनी मुख्यमंत्री देवेंद्र फडणवीस यांची त्यांच्या निवासस्थानी भेट घेतली असल्याचे वृत्त प्रसारमाध्यमांनी दिले आहे. या भेटीमध्ये नेमकी दोन्ही नेत्यांमध्ये काय चर्चा झाली? याबाबत मात्र अद्याप माहिती समोर आलेली नाही. मात्र एकनाथ खडसे यांच्या भाजपवर प्रवेशाची चर्चा या वृत्तामुळे पुन्हा एकदा सुरू झाली आहे. एकनाथ खडसे यांची सून केंद्रीय मंत्री आहेत. तर मुलगी शरदचंद्र पवार राष्ट्रवादी काँग्रेस पक्षात प्रमुख पदाधिकारी आहेत. त्यामुळे आता एकनाथ खडसे यांच्या संदर्भात भाजप काय निर्णय घेतो? हे पहावे लागेल.