धुळे स्थानिक गुन्हे शाखेची मोठी कारवाई : चाळीसगावकडे जाणारा पावणेसात लाखांचा बेकायदेशीर मद्यसाठा जप्त
Major action by Dhule Local Crime Branch : Illegal liquor worth Rs. 7.5 lakhs bound for Chalisgaon seized धुळे (6 फेब्रुवारी 2025) : धुळे स्थानिक गुन्हे शाखेने बेकायदेशीररित्या मद्यसाठ्याची वाहतूक करणार्‍या पिकअप वाहनातून दोन लाख 63 हजार 520 रुपयांचा मद्यसाठा जप्त केला आहे. ही कारवाई 4 रोजी धुळे गुन्हे शाखेचे वरिष्ठ पोलीस निरीक्षक श्रीराम पवार यांना मिळालेल्या माहितीनंतर चाळीसगाव चौफुलीवर केली. या कारवाईने बेकायदेशीररित्या मद्य वाहतूक करणार्‍यांच्या गोटात खळळळ उडाली आहे.
गोपनीय माहितीवरून करवाई
स्थानिक गुन्हे शाखेचे वरिष्ठ निरीक्षक श्रीराम पवार यांना महेंद्रा पिकअप वाहन क्रमांक एम.एच.04 जीएफ 9679 द्वारे मद्याची शिरपूरकडून चाळीसगाव चौफुलीमार्गे चाळीसगावकडे वाहतूक होणार असल्याची माहिती मिळताच त्यांनी पथकाला निर्देश दिले. पथकाने 4 रोजी सहा वाजेच्या सुमारास चाळीसगाव चौफुलीवर सापळा रचल्यानंतर संशयीत वाहन येताच झडती घेतली असता त्यात मद्यसाठा आढळल्याने वाहनासह चालक हकीम याकुब पटेल (33, रा.प्लॉट नं.251/2, एम.आय.डी.सी. सेक्टर, जळगाव, काट्या जवळ, साईनगर, जळगाव) यास ताब्यात घेतले. चार लाख रुपये किंमतीचे वाहन व दोन लाख 63 हजार 520 रुपयांचा मद्यसाठा मिळून सहा लाख 63 हजार 520 रुपयांचा मुद्देमाल जप्त करण्यात आला. विदेशी दारु वाहतुकीचा अगर पुरवठा करण्याचा परवाना नसतांना शासनाचा कर बुडवून वाहतूक होत असताना ही कारवाई करीत चाळीसगाव रोड पोलीस ठाण्यात गुन्हा दाखल करण्यात आला.
