न्यूज नेटवर्क । दौंड (10 फेब्रुवारी 2025) : घरातील कलहानंतर संतप्त आईने आपल्या दोन चिमुकल्यांची ओढणीने गळा आवळत हत्या केली. ही घटना दौंड तालुक्यातील स्वामी चिंचोली गावात शनिवारी घडली. दोन मुलांची हत्या करून महिलेने गाढ झोपेत असलेल्या पतीवर कोयत्याने वार करत त्याच्याही खुनाचा प्रयत्न केला.
कलहातून केली हत्या
पियू दुर्योधन मिंढे (वय 2.5 ), शंभू दुर्योधन मिंढे (वय, सव्वा वर्ष) अशी या दुर्दैवी घटनेत मृत्युमुखी पडलेल्या मुलांची नावे आहेत. याप्रकरणी कोमल दुर्योधन मिंढे (30) हिला अटक करण्यात आली तर या घटनेत महिलेचे पती दुर्योधन आबासाहेब मिंढे (36) यांच्यावर कोयत्याने हल झाल्याने ते जखमी झाले असून, त्यांच्यावर बारामतीतील खासगी रुग्णालयात उपचार सुरू आहेत
दुर्योधन मिंढे एका माहिती-तंत्रज्ञान कंपनीत संगणक अभियंता आहेत. सध्या ते वर्क फ्रॉम होम काम करतात. त्यांची पत्नी कोमल शिक्षित आहे. मिंढे कुटुंबीय स्वामी चिंचोली गावातील शिंदे वस्ती भागात राहायला आहेत. शनिवारी पहाटे साडेपाचच्या सुमारास कोमलने ओढणीने पियू आणि शंभू यांचा गळा आवळून खून केला. त्यानंतर गाढ झोपेत असलेल्या दुर्योधन यांच्यावर कोयत्याने वार करण्यास सुरुवात केली. दुर्योधन यांनी आरडाओरडा करण्यास सुरुवात केली.
दुर्योधन यांचे आई-वडील, भाऊ झोपेतून जागे झाले. जखमी अवस्थेतील दुर्योधन यांना तातडीने बारामतीतील खासगी रुग्णालयात दाखल करण्यात आले. या घटनेची माहिती मिळताच दौंडचे उपविभागीय अधिकारी बापूसाहेब दडस, पोलिस निरीक्षक गोपाळ पवार, सहायक निरीक्षक नागनाथ पाटील, उपनिरीक्षक दत्तात्रय कुंभार, सहायक फौजदार गोरख मलगुंडे यांनी घटनास्थळी धाव घेतली.
