प्लॅटफार्म बदलाची उद्घोषणा अन् नवी दिल्ली रेल्वे स्थानकावर झाली चेंगराचेंगरी ; 18 प्रवाशांचा दुर्दैवी मृत्यू
नवी दिल्ली (16 फेब्रुवारी 2025) : प्रयागराज महाकुंभाला जाण्यासाठी हजारो भाविक एकाचवेळी जमल्यानंतर ट्रेनमध्ये चढताना अचानक झालेल्या चेंगराचेंगरीत तब्बल 18 प्रवाशांचा मृत्यू ओढवला. शनिवारी रात्री नवी दिल्ली रेल्वे स्थानकावर हा प्रकार घडला. मृतांमध्ये 9 महिला, 4 पुरुष आणि 5 मुले आहेत. यापैकी सर्वाधिक 9 जण बिहारमधील, 8 दिल्लीतील आणि एक हरयाणातील आहेत. ही घटना रात्री 10 वाजताच्या सुमारास प्लॅटफॉर्म क्रमांक 13 आणि 14 वर घडली.
प्रवाशांना अचानक प्लॅटफॉर्म 14 वरून प्लॅटफॉर्म 16 वर पाठवले
प्रत्यक्षदर्शीने दिलेल्या माहितीनुसार, लोक अचानक प्लॅटफॉर्म क्रमांक 14 वरून प्लॅटफॉर्म क्रमांक 16 वर जाऊ लागल्याने चेंगराचेंगरी झाली. सहसा, महाकुंभसाठी नियोजित विशेष गाड्या प्लॅटफॉर्म 14 आणि 16 वर येतात. महाकुंभाला जाणारी ट्रेन प्लॅटफॉर्म 14 वर उशिरा आली, त्यानंतर प्रयागराजहून एक ट्रेन प्लॅटफॉर्म 16 वर येत असल्याची घोषणा करण्यात आली. यावेळी लोकांचा गोंधळ सुरू झाला. घटनास्थळी पोलिसांची संख्या कमी होती.
रेल्वेने स्पष्टीकरण दिले
अपघातानंतर लगेचच परिस्थिती सामान्य झाल्याचे रेल्वेने सांगितले. कोणतीही ट्रेन रद्द झाली नाही. गाड्यांच्या वेळेत कोणताही बदल करण्यात आला नाही. कोणताही प्लॅटफॉर्म बदलला नाही. आम्ही अतिरिक्त विशेष गाड्या चालवल्या आहेत. त्या ठिकाणी सामान्य गर्दी होती. पादचारी पुलावरून एका प्रवाशाचा पाय घसरल्याने ही घटना घडली. आता परिस्थिती पूर्णपणे सामान्य आहे. गाड्यांचे कामकाज सुरळीत सुरू आहे.
