बनावट नोटांच्या बहाण्याने जबरी लूटीचा डाव उधळला : साक्री तालुक्यातील टोळीला नंदुरबार गुन्हे शाखेकडून बेड्या

नंदुरबार (21 फेब्रुवारी 2025) : एक लाखांच्या बदल्यात सहा लाखांच्या नोटा देण्याच्या बहाण्याने लूट केली जाणार असल्याची माहिती नंदुरबार गुन्हे शाखेचे पोलीस निरीक्षक हेमंत पाटील यांना मिळाल्यानंतर त्यांनी पथकाला कारवाईचे निर्देश दिले. धुळे चौफुलीवरील दर्ग्यासमोर संशयीत आल्यानंतर पथकाने दोघांना पकडले तर एक संशयीत मात्र पसार होण्यात यशस्वी झाला. एक लाख 80 हजारांचा मुद्देमाल आरेापींच्या ताब्यातून जप्त करण्यात आला. दरम्यान, आरोपींच्या अटकेनंतर जबरी लुटीचा एक गुन्हा उघडकीस आणला असून बनावट नोटांचे रॅकेट समोर येण्याची शक्यता वर्तवली जात आहे.

गोपनीय माहितीवरून कारवाई
नंदुरबार गुन्हे शाखेचे वरिष्ठ निरीक्षक हेमंत पाटील यांना एक लाखांच्या बदल्यात सहा लाखांच्या बनावट नोटा देण्याच्या बोलावल्यानंतर जबरी लूट होणार असल्याची माहिती मळाल्यानंतर त्यांनी पथकाला निर्देश दिले. पथक धुळे चौफुलीजवळील दर्ग्यावर आल्यानंतर ईनेश दिपू भोसले (24, जामदा, ता.साक्री, जि.धुळे), बाळूशेठ सजनसिंग भोसले (32, जामदा, ता.साक्री, जि.धुळे) यांना अटक करण्यात आली तर बिनोर महारू पवार (जामदा, ता.साक्री, जि.धुळे) पसार होण्यात यशस्वी झाला. अटकेतील आरोपींच्या ताब्यातून तीन बनावट नोटांचे बंडल, 15 हजार रुपये किंमतीचे तीन मोबाईल, एक चैन व दोन वाहने मिळून एक लाख 80 हजारांचा मुद्देमाल जप्त करण्यात आली.