बंदुकीच्या धाकावर तरुणीवर अत्याचार
कोल्हापूर (27 फेब्रुवारी 2025) : बंदुकीचा धाक दाखवत व लग्न करण्याचे वचन देत तरुणीवर वारंवार अत्याचार करण्यात आला व त्यातून पीडीता गर्भवती राहिल्याने आरोपीने दोन वेळा गोळ्या देत गर्भपात केल्याचा प्रकार कोल्हापूरात घडला आहे. याप्रकरणी एएस ट्रेडर्सविरोधी कृती समितीचा प्रमुख विश्वजित सचिन जाधव (रा. आयडियल कॉलनी, फुलेवाडी) याच्यावर शाहूपुरी पोलिसात गुन्हा दाखल करण्यात आला.
काय घडले कोल्हापूरात
गुंतवणूकदारांची फसवणूक करणार्या एएस ट्रेडर्स कंपनीच्या विरोधात विश्वजित जाधव याने काही गुंतवणूकदारांना सोबत घेऊन विरोधी कृती समिती तयार केली होती. या समितीच्या माध्यमातून त्यांनी तपासाबाबत उच्च न्यायालयात पाठपुरावा सुरू ठेवला होता. त्याच्या विरोधात एका तरुणीने शाहूपुरी पोलिस ठाण्यात फिर्याद दिली. पीडितेच्या फिर्यादीनुसार संशयित जाधव याने लग्नाचे आमिष दाखवून 2018 पासून वारंवार शरीरसंबंध ठेवण्यास भाग पाडले.
बंदुकीचा धाक दाखवून आणि अश्लील व्हिडिओ व्हायरल करण्याची भीती घालून लैंगिक शोषण केले. गर्भधारणा झाल्यानंतर दोनवेळा गोळ्या देऊन गर्भपात घडवून आणला. मारहाण करून जिवे मारण्याची धमकी दिली. त्रास असह्य झाल्याने अखेर तिने शाहूपुरी पोलिस ठाण्यात धाव घेऊन फिर्याद दिली. तपास पोलिस निरीक्षक संतोष डोके करीत आहेत.
