जळगाव शनीपेठ पोलिसांची मोठी कारवाई : निर्दयतेने गुरांची वाहतूक करणारे तीन वाहन जप्त : 14 गुरांची सुटका
जळगाव (12 मार्च 2025) : शहरातील ममुराबाद रोड ते भीलपूरा चौकादरम्यानच्या रस्त्यावर अवैधपणे आणि निर्दयतेने गुरांची वाहतूक करणार्‍या तीन वाहनांवर शनीपेठ पोलिसांनी कारवाई केली. 14 गुरांची सुटका करण्यात आली आहे. ही कारवाई मंगळवार, 11 मार्च रोजी सकाळी सात वाजता करण्यात आले आहे. शनीपेठ पोलीस ठाण्यात चार जणांविरोधात गुन्हा दाखल करण्यात आला.
जळगाव शहरांमधून गुरांची अवैधपणे वाहतूक होत असल्याची गोपनीय माहिती शनिपेठ पोलीस ठाण्याचे पोलीस निरीक्षक रंगनाथ धारबळे यांना मिळाली. त्यानुसार त्यांनी पथकाला कारवाई करण्याबाबतच्या सूचना दिल्या. मंगळवार, 11 मार्च रोजी सकाळी सात वाजता गुरुनानक नगर परिसरातील ममुराबादरोड ते भीलपुरा चौक दरम्यानच्या रस्त्यावर त्यांनी कारवाई केली असता यावेळी तीन पिकअप वाहन आढळल्या.
या वाहनांमध्ये निर्दयतेने गुरांची वाहतूक होत असल्याचे निदर्शनास आले. त्यानुसार त्यांनी पिकअप वाहन क्रमांक (एम.एच.19 बी.एम.3135), (एम.एच.19 एस.6770) आणि (एम.एच.43 बी.0409) ही तीनही वाहने पोलिसांनी ताब्यात घेतले. याप्रकरणी पोलीस कॉन्स्टेबल गिरीश पाटील यांनी दिलेल्या फिर्यादीवरून वाहन चालक आसीफ मुनव्वर खान सरदार खान कुरेशी (34), समीर शहा दिलावर शहा (28), शेख मुबारक शेख अखिल (20) आणि दगडू आनंदा साळुंखे (45, सर्व राहणार चोपडा) यांच्या विरोधात शनिपेठ पोलीस ठाण्यात गुन्हा दाखल करण्यात आला. तपास पोलीस नाईक विजय निकम करीत आहे.
