प्रेमापोटी पुरुषाशी लैंगिक संबंध अत्याचार नाही : सर्वोच्च न्यायालयाचा निकाल
नवी दिल्ली (17 मार्च 2025) : एखाद्या स्त्रीने प्रेमापोटी पुरुषाशी लैंगिक संबंध ठेवले तर तो बलात्कार मानता येणार नाही, असा महत्वपूर्ण निर्णय सर्वोच्च न्यायालयाने एका खटल्यात दिला आहे. याबाबत वृत्त ‘एबीपी माझा’ने दिले आहे.
असे आहे नेमके प्रकरण
एका महिलेने 16 वर्ष संमतीने पुरूषासोबत संबंध ठेवले मात्र नंतर तिने दावा केला की आरोपीने तिला लग्नाचे खोटे वचन दिले आणि तिच्याशी जबरदस्तीने संबंध ठेवले. एका उच्चशिक्षित महिलेने एका दशकाहून अधिक काळ कथित लैंगिक छळाची तक्रार दाखल न केल्याने सर्वोच्च न्यायालयाने आश्चर्य व्यक्त केले.
3 मार्च रोजी दिलेल्या निकालात न्यायालयाने म्हटले आहे की, आरोपीचा सुरुवातीपासून लग्नाचा कोणताही हेतू नव्हता हे सिद्ध झाल्याशिवाय केवळ लग्नाचे वचन न पाळणे हा बलात्काराचा गुन्हा ठरत नाही. आरोपीने दुसर्‍याशी लग्न केल्यानंतर महिलेने एफआयआर दाखल केल्याचे सर्वोच्च न्यायालयाने नमूद केले. तक्रारीमागे सुडाची भावना असल्याचे दिसून येत आहे. न्यायमूर्ती विक्रम नाथ आणि न्यायमूर्ती संदीप मेहता यांच्या खंडपीठासमोर सुनावणी झाली आणि आरोपींना दिलासा दिला.
