नागपूरात औरंगजेबाच्या कबरीवरून दोन गट भिडले : दगडफेकीत 15 पोलीस जखमी, शहरात कर्फ्यू

काय घडले नेमके
सोमवारी सकाळी 11.30 वाजता दरम्यान शिवाजी महाराज पुतळयासमोर विश्वहिंदु परिषद, बजरंग दल, नागपूर तर्फे श्री छत्रपती शिवाजी महाराज पुतळा, महाल नागपूर येथे विश्वहिंदु परिषद, बजरंग दल, नागपूरचे कार्यकर्ते एकत्रित येवून सदर ठिकाणी 200 ते 250 कार्यकर्ते जमा होउन औरंगजेब की कबर हटाव अनुषंगाने आंदोलन करण्यात आले. त्यानंतर गणेशपेठ पोलीस ठाणे हद्यीत भालदारपुरा येथे संध्याकाळी 19.30 वाजता सुमारे विशिष्ट समाजातील 80 ते 100 लोकांनी गैर कायद्याची मंडळी जमवून पोलीसांवर दगडफेक केली व तागावाचे वातावरण निर्माण करून कायदा व सुव्यवस्थेचा प्रश्न निर्माण केला आहे. त्यामुळे रस्त्यावरून येणार्‍या-जाणार्‍या लोकांचे जिवीतास धोका निर्माण होवून सार्वजनिक शांततेला बाधा निर्माण झाली, अशी माहिती नागपूर पोलिसांनी दिली.

58 संशयीत ताब्यात
उपद्रव माजवणार्‍या लोकांना रोखण्यासाठी पोलिसांनी अश्रूधुराच्या नळकांड्याही फोडल्या. डीसीपी निकेतन कदम यांच्यावर कुर्‍हाडीने हल्ला करण्यात आला. या घटनेत अनेक लोक जखमी झाले आहेत. पोलिसांनी 58 हून अधिक जणांना ताब्यात घेतले आहे.

उपमुख्यमंत्री एकनाथ शिंदे म्हणाले की, हा हल्ला नियोजनबद्ध पद्धतीने करण्यात आला होता. पोलिस पथकावर दगडफेक करण्यात आली आहे. असे कृत्य करणार्‍यांना सोडले जाणार नाही. औरंगजेब हा देशाचा शत्रू आहे. त्याच्या समर्थकांवर कडक कारवाई केली जाईल.

सोमवारी संध्याकाळी सात ते साडेसातच्या दरम्यान मोठ्या संख्येने एक गट शिवाजी चौकाच्या जवळ पोहोचला होता. या गटाने घोषणाबाजीला सुरुवात केली. विश्व हिंदू परिषदेने दुपारी केलेल्या आंदोलनासंदर्भात त्यांचा रोष होता. घोषणाबाजी सुरू होताच परिसरातील दुसर्‍या गटानेही घोषणाबाजी सुरू केली. त्यानंतर पोलिसांना पाचारण करण्यात आले. पोलिसांनी घटनास्थळी धाव घेत घोषणाबाजी करणार्‍या दोन्ही गटांना वेगवेगळे केले. त्यानंतर पोलिसांनी सर्वांना शिवाजी चौकावरून चिटणीस पार्कच्या दिशेने मागे ढकलले.

यानंतर दोन्ही गटात तुफान राडा झाला आणि दगडफेक करण्यात आली. या दगडफेकीत अनेक वाहनांचे नुकसान झाले आहे. दगडफेकीसोबत जाळपोळही करण्यात आली. पोलिसांनी घटनास्थळी धाव घेतल्यानंतर जमावाकडून पोलिसांच्या दिशेनेही दगड भिरकावण्यात आले. यामध्ये दोन पोलिस कर्मचारी आणि काही नागरिक जखमी झाल्याची माहिती आहे. परिस्थिती नियंत्रणात आणण्यासाठी अश्रुधुराच्या नळकांड्या फोडल्या. जमावाला पांगवण्यासाठी पोलिसांकडून शर्थीचे प्रयत्न सुरू आहेत. पोलिसांनी दंगा काबू पथकाला पाचारण केले आहे.

अधिकार्‍यांनी सांगितले की, आंदोलकांनी पुतळ्यासोबत एक धार्मिक पुस्तक जाळल्याची अफवा पसरली त्यामुळे दोन्ही बाजूंनी दगडफेक झाली. अनेक वाहनांची तोडफोड करण्यात आली. दोन जेसीबी पेटवून देण्यात आले.

नागपूरचे डीसीपी अर्चित चांडक म्हणाले की, गैरसमजातून ही घटना घडली. परिस्थिती नियंत्रणात आहे. सर्वांना आवाहन केले की, घराबाहेर पडू नका. दगडफेक करू नका. काही पोलीस कर्मचारी जखमी झाले आहेत. माझ्या पायालाही थोडी दुखापत झाली.