धुळ्यात कोम्बिंगमध्ये कुख्यात सत्तार मेंटलला बेड्या
तीन पिस्टलसह चौकडी जाळ्यात : दरोड्याचा डाव उघड ; चौघा हद्दपारांवरही कारवाई
धुळे (29 मार्च 2025) : धुळ्यासह जिल्ह्यातील गुन्हेगारी कारवाया रोखण्यासाठी धुळे जिल्हा पोलीस अधीक्षक श्रीकांत धीवरे यांच्या नेतृत्वात शुक्रवार, 28 रोजी पहाटे पाच ते 12 दरम्यान कोम्बिंग ऑपरेशन राबवण्यात आले. या कारवाईत शहरातील कुख्यात वाण्टेड गुन्हेगार सत्तार मासुम पिंजारी उर्फ सत्तार मेंटल (40, पत्रेवाली मशीदजवळ, धुळे) यास गावठी कट्टा व दोन जिवंत काडतूसासह बेड्या ठोकण्यात आल्या. आरोपीने अटकेदरम्यान प्रतिकार करीत पथकावर मिरची पूड फेकल्याने चाळीसगाव रोड ठाण्याचे चार कर्मचारी जखमी झाले. दरम्यान, दिवसभरातील ऑल आऊ आऊट कारवाईत पोलिसांनी दरोड्याचा डाव उघडत सहा आरोपींना अटक केली तर गावठी कट्टा बाळगणार्या चौघांकडून तीन पिस्टलसह सहा जिवंत काडतूस जप्त करण्यात आले. गुन्हे शाखेने एका वाहनातून पाच लाखांची विदेशी दारू जप्त केली. जिल्हा पोलीस दलाच्या धडक कारवाईने गुन्हेगारी वर्तुळात मोठी खळबळ उडाली.
कुख्यात सत्तार मेंटला जाळ्यात
धुळे-पारोळा रोडवरील नाल्याजवळ दरोडा व आर्म अॅक्टच्या गुन्ह्यात पसार असलेला आरोपी सत्तार मेंटला यास चाळीसगाव रोड पोलिसांनी अटक केली. आरोपीने प्रतिकार करीत पथकावर मिरची पूड फेकल्याने चाळीसगाव रोड ठाण्याचे पोलीस उपनिरीक्षक शरद लेंडे, हवालदार सुनील पाथरवट, अविनाश वाघ, चालक कॉन्स्टेबल योगेश पाटील जखमी झाले. आरोपीच्या ताब्यातून गावठी कट्टा व दोन जिवंत काडतूस जप्त करण्यात आले. विशेष म्हणजे आरोपी सत्तार मेंटल हा कुख्यात गुन्हेगार असून त्याच्याविरोधात गंभीर स्वरूपाचे 41 गुन्हे दाखल आहेत.
चार गुन्हेगारांकडून तीन पिस्टल जप्त
चाळीसगाव रोड पोलिसांनी आरोपी सत्तार मेंटलकडून गावठी कट्टा व दोन जिवंत काडतूस, गुन्हे शाखेने अनिल महारू पावरा (23, धाबापाडा, ता.शिरपूर) कडून दोन जिवंत काडतूस व कट्टा, धुळे तालुका पोलिसांनी अब्दुल सलाम अब्दुल मोमीन शेख (32, हजार खोली, धुळे) कडून कट्टा व दोन जिवंत काडतूस जप्त केले. एकूण चार गुन्हेगारांकडून तीन पिस्टल व सहा जिवंत काडतूस जप्त करण्यात आले.
दरोड्यापूर्वीच टोळी जाळ्यात
पर्यवेक्षाधीन पोलीस उपअधीक्षक सागर देशमुख व धुळे तालुका पोलीस निरीक्षक व सहकार्यांनी दरोड्याचा डाव उधळत सहा जणांच्या टोळीला भदाणे शिवारातील अक्कलपाडा-भदाणे रस्त्यावर बेड्या ठोकल्या. इनोव्हा कार (एम.एच.14 एच.डी.6393) व एका विना क्रमांकाच्या कारमधून संशयीत आल्यानंतर त्यांना बेड्या ठोकण्यात आल्या. विशाल सुखदेव जाधव (22, नवलाखुभे्र, ता.मावळ, जि.पुणे), कुणाल रोहिदास बोंबले (21, वेताळ, ता.खेडा, जि.पुणे), पियुष शैलेंद्र खांगटे (19, राजगुरूनगर कोर्टाजवळ, पुणे), साहिल रमेश लाड (21, दहिवली, ता.कर्जत, जि.पुणे), कलीम साहेबराव शेख (24, सेक्टर 27, रंजनपाडा, खारघर, पनवेल), सतीश राम तायडे (26, नेरूळ, नवी मुंबई) अशी अटकेतील संशयीतांची नावे आहेत. आरोपींच्या ताब्यातून तलवार, टॉमी, मिरची पूड, हॉकी स्टीक, कटर तसेच दरोड्यासाठी लागणारे साहित्य जप्त करण्यात आले.
पाच लाखांच्या विदेशी दारूसह दोघे जाळ्यात
धुळे गुन्हे शाखेचे वरिष्ठ पोलीस निरीक्षक श्रीराम पवार यांना मिळालेल्या माहितीवरून नरडाणा पोलीस ठाणे हद्दीत डस्टर कार (जी.जे.27 एएच 0372) मधून चार लाख 87 हजार 100 रुपये किंमतीची राज्यात प्रतिबंधीत दारू जप्त करण्यात आले. चालक विजय गंगाराम राजपाल (23, जुनी सिंधी कॉलनी, नंदुरबार) व रोहित लालचंद रोहिडा (23, जुनी सिंधी कॉलनी, नंदुरबार) यांना अटक करण्यात आली.
चार वॉण्डेड आरोपी जाळ्यात
पोलिसांनी गावठी दारू बाळगल्याप्रकरणी तब्बल 42 गुन्हे दाखल करीत दोन लाख दोन हजार 270 रुपयांचा मुद्देमाल नष्ट केला त्याशिवाय गुन्हे शाखेने तीन तर चाळीसगाव रोड पोलिसांनी एक वॉण्टेड गुन्हेगाराला अटक केली. हद्दपार असतानाही आदेशाचे उल्लंघण करीत शहरात आलेल्या चौघांवर गुन्हा दाखल करण्यात आला तर सार्वजनिक ठिकाणी उपद्रव करणार्या सात जणांविरोधात कारवाई करण्यात आली. शहर वाहतूक शाखेने दारू पिवून वाहने चालवणार्या सात जणांविरोधात कारवाई करीत 70 हजारांचा दंड वसुल केला तर मोटार व्हेईकल अॅक्टच्या 253 केसेस करीत एक लाख 20 हजार 500 रुपये दंड वसुल केला. शहरातील हॉटेल, लॉजेस, तसेच ओयो हॉटेलची तपासणी करण्यात आली.
