बनावट जन्म-मृत्यू दाखला प्रकरणात बांग्लादेशी कनेक्शन ?

Bangladeshi connection in fake birth and death certificate case? जळगाव (9 एप्रिल 2025) : जळगाव महानगरपालिकेमध्ये जन्म मृत्यू नोंदणीच्या दाखल्यांवर तहसीलदारांचे बनावट सही, शिक्के आढळल्याप्रकरणी 43 जणांविरुद्ध शहर पोलिसात गुन्हा दाखल करण्यात आला होता. या प्रकरणात बांगलादेशी घुसखोरीचे कनेक्शन जोडण्यात आल्याने ते तपासासाठी स्थानिक गुन्हे शाखेकडे वर्ग करण्यात आल्याचे सांगितले जाते.

दोन आरोपींना अटक
स्थानिक गुन्हे शाखेने प्रकरणाचा तपास करून यातील दोन मुख्य संशयित वकील आरोपींना अटक केली आहे. दोघांना न्यायालयात हजर केले असता तीन दिवसांची पोलिस कोठडी न्यायालयाने सुनावली आहे, अशी माहिती पोलीस अधीक्षक डॉ महेश्वर रेड्डी यांनी पत्रकार परिषदेत दिली.

जळगाव महानगरपालिकेमध्ये जन्म-मृत्यू नोंदणी विभागामध्ये तहसील कार्यालयातून 50 दाखल्यांसाठी प्रमाणपत्रे आली होती. या प्रमाणपत्रांवर असलेले तहसीलदारांचे सही व शिक्के बनावट असल्याचा संशय जन्ममृत्यू नोंदणी विभागाला आला होता. याप्रकरणी तहसीलदारांना पत्र लिहून चौकशीची मागणी केली होती. तहसीलदार शितल राजपूत यांनी चौकशी केली. संशय खरा ठरला. मग पुढे याप्रकरणी नायब तहसीलदार यांनी दाखल केलेल्या तक्रारीवरून शहर पोलिस ठाण्यात 43 जणांविरुद्ध गुन्हा दाखल करण्यात आला होता. प्रकरणाचा संबंध बांगलादेशी घुसखोरीशी जोडला जात असल्याने हा गुन्हा स्थानिक गुन्हे शाखेकडे तपासासाठी वर्ग करण्यात आला. पोलिसांनी या प्रकरणातील 35 जणांची चौकशी केली. यात मुख्य आरोपी म्हणून वकील शेख मोहम्मद रईस बागवान (रा. शाहूनगर, जळगाव), वकील शेख मोहसीन शेख सादिक मणियार (रा. पिंप्राळा, जळगाव) यांचे नाव उघड झाले आहे.