शिरपूर तालुका पोलिसांची मोठी कारवाई : वनजमिनीसह अॅपे रिक्षातून 58 लाखांचा गांजा जप्त
गांजा तस्कर हादरले : त्रिकूटाला पडल्या बेड्या l गांजा शेती पोलिसांच्या रडारवर
शिरपूर (9 एप्रिल 2025) : शिरपूर तालुका पोलीस ठाणे हद्दीतील व मध्यप्रदेश राज्याच्या सीमेपासुन 100 मीटर अंतरावरील नियत क्षेत्र आंबा कक्ष क्रमांक 833 वरील गांजा शेतीतून शिरपूर तालुका पोलिसांसह वनविभागाने संयुक्त कारवाईत सुमारे 57 लाखांचा ओला हिरवट रंगाचा गांजा जप्त केला. ही कारवाई मंगळवार, 8 एप्रिल रोजी करण्यात आली. दरम्यान, दुसर्या कारवाईत शिरपूर तालुका पोलिसांनी अॅपे रिक्षातून दिड लाखांचा गांजा पकडत तिघांना अटक केली.
57 लाखांचा गांजा जप्त
वनविभागाच्या अधिकार्यांना गस्तीदरम्यान नियत क्षेत्र आंबा कक्ष क्रमांक 833 मध्ये मका व ज्वारीच्या शेतातून संशयीत बाहेर येताना दिसताच पथकाला पाहून ते मध्यप्रदेशच्या दिशेने पसार झाले. यावेळी यंत्रणेने छापेमारी करीत 56 लाख 85 हजार 700 रुपये किंमतीचा हिरवट, ओलसर गांजा जप्त केला. पळासनेर वनपाल बीपीन महाजन यांच्या फिर्यादीवरुन अज्ञात आरोपीविरुध्द शिरपुर तालुका पोलिसात गुन्हा दाखल करण्यात आला.
शिरपूर तालुका पोलिसांकडून दिड लाखांचा गांजा जप्त
शिरपूर तालुक्याचे पोलीस निरीक्षक निरीक्षक जयपाल हिरे यांना चिलारे येथून दहिवदकडे तीन संशयीत अॅपेतून गांजा वाहतूक करणार असल्याची माहिती मिळाल्यानंतर त्यांनी पथकाला निर्देश दिले. राष्ट्रीय महामार्ग क्र.52 वर कारखाना फाट्याच्या पुढे एचपी पेट्रोलपंपाजवळ दहिवद येथे सापळा लावल्यानंतर संशयीत रुपेश गेमश्या भाग्वादे ऊर्फ भुगावाडे (गेरु घाटी, ता.वरला, जि.बडवानी, मध्यप्रदेश), अनिल गुजार्या पावरा व कैलास कालुसिंग पावरा (दोन्ही रा.चिलारे) यांना अॅपेसह ताब्यात घेण्यात आले. ही कारवाई मंगळवारी करण्यात आली. संशयीतांकडून प्रत्येकी 10 किलो याप्रमाणे एकूण 30 किलो गांजा जप्त करण्यात आला. कॉन्स्टेबल मुकेश पावरा यांनी दिलेल्या फिर्यादवरुन तीन्ही आरोपींविरोधात गुन्हा दाखल करण्यात आला. तपास पोलीस उपनिरीक्षक मिलिंद पवार करीत आहेत. आरोपींना दोन दिवसांची पोलीस कोठडी सुनावण्यात आली.
यांनी केली कारवाई
ही कारवाई धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे, पोलीस उपअधीक्षक सुनील गोसावी यांच्या मार्गदर्शनाखाली शिरपूर तालुका पोलीस निरीक्षक जयपाल हिरे, सुनील वसावे, मिलिंद पवार, उदय पवार, हवालदार संतोष पाटील, हवालदार संदीप ठाकरे, हवालदार राजु ढिसले, हवालदार जाकीरोद्दीन शेख, हवालदार जगन्नाथ कोळी, हवालदार दिनेश सोनवणे, कॉन्स्टेबल जयेश मोरे, कॉन्स्टेबल मनोज नेरकर, कॉन्स्टेबल स्वप्नील बांगर, कॉन्स्टेबल मुकेश पावरा, कॉन्स्टेबल ग्यानसिंग पावरा, चालक हवालदार अल्ताफबेग मिर्झा, चालक कॉन्स्टेबल इसरार फारुकी, तसेच वनविभागाचे धुळे उपवनसरंक्षक नितीन कुमारसिंग, शिरपूर सहाय्यक वनसंरक्षक राहुल घरट, सांगवी वनपरिक्षेत्रीय अधिकारी काशीनाथ देवरे, पळासनेर वनपाल बिपीन महाजन व वनविभागाच्या इतर कर्मचार्यांनी केली.
