बनावट जन्म दाखले घेणारे बांगलादेशीच : किरीट सोमय्या यांचा जळगावात गौप्यस्फोट
जन्म दाखल्यांसाठी बनावट कागदपत्रे सादर करण्याचा राज्यात मोठा घोटाळा ; केंद्र सरकारची एजन्सी चौकशीला येणार
Only Bangladeshis get fake birth certificates : Kirit Somaiya’s revelation in Jalgaon जळगाव (10 एप्रिल 2025) : राज्यात 2024 विधानसभा निवडणुकीच्या आचार संहितेदरम्यान मोठ्या प्रमाणात अपात्र लोकांनी बनावट जन्मदाखले मिळविले. मुख्यमंत्री देवेंद्र फडणवीस यांच्या आदेशानंतर चौकशीअंती राज्यात 17 ठिकाणी गुन्हे दाखल झाले आणि या फसव्या, बनावट दाखल्यांचा घोटाळा सहा महिन्यात समोर आला, असा गौप्यस्फोट भाजपचे ज्येष्ठ नेते किरीट सोमय्या यांनी मंगळवारी जळगावात केला.
जळगावातही मोठा घोटाळा
जळगावात बोगस व बनावट सहिने खोटे जन्म दाखले घेतले गेले. या प्रकरणी गुन्हा दाखल झाला. या पार्श्वभूमीवर सोमय्या हे मंगळवारी दुपारी 3.30 वाजता पोलीस अधीक्षक कार्यालयात आले होते. त्यांनी दुपारी साडेतीन वाजेच्या सुमारास पोलीस अधीक्षक डॉ.महेश्वर रेड्डी यांची भेट घेतली. तब्बल एक तास बंद कॅबिनमध्ये त्यांनी या गंभीर प्रकरणाबद्दल डॉ.रेड्डी यांच्याशी चर्चा केली. यावेळी भाजपचे काही पदाधिकारीही उपस्थित होते. ही चर्चा आटोपल्यानंतर त्यांनी माध्यमांशी संवाद साधला.
भारत सरकार एजन्सीकडून चौकशी
2024 मध्ये आचार संहिता दरम्यान, दोन लाख 23 हजार लोकांचे अर्ज जन्म दाखल्यांसाठी राज्यातील विविध ठिकाणी प्राप्त झाले. या अनेक अपात्र लोकांनी जन्मदाखले प्राप्त केले. यामध्ये 25 ते 65 वयोगटातील लोकांचा समावेश असून बनावट दाखले घेणारे बांगलादेशी असून याप्रकरणी सर्वंकष चौकशी करण्याची गरज आहे, असे किरीट सोमय्या यांनी नमूद केले.
सिल्लोडचे बांगलादेश कनेक्शन
पाच हजारांहून अधिक लोकांनी जन्मदाखला घेण्यासाठी केवळ आधारकार्ड हा पुरावा दिला आहे. सिल्लोड येथे बोगस दाखले घेणारे सर्वाधिक 90 टक्के मुस्लीम असून त्यांचे बांगलादेश कनेक्शन आहे. या ठिकाणी त्यांचा मोठा प्रभाव आहे, असा दावा किरीट सोमय्या यांनी केला.
योग्यवेळी केंद्रीय एजन्सी एटीएस आणि एमआयएकडून चौकशी
भारत सरकारच्या गृह विभागाचे बोगस जन्म दाखले प्रकरणाकडे बारकाईने लक्ष आहे. केंद्राच्या एटीएस आणि एमआयए या एजन्सींशी मी याविषयी चर्चा करून त्यांना राज्यातील या बनावट प्रकरणाची माहिती दिली. योग्य वेळी या एजन्सी चौकशीत प्रत्यक्ष सहभागी होतील. बोगस जन्म दाखले संदर्भात केंद्रीय गृह खात्याने राज्य शासनाकडून अहवालही मागविला आहे, असे ते म्हणाले.
जन्माचे बनावट पुरावे दिले
भारतात जन्मले, तर त्याची नोंद होते मात्र या लोकांनी ते कागदपत्रे दाखले घेण्यासाठी ते सादर केले नाहीत म्हणजे ते त्यांच्याकडे नव्हतेच. देशातील रहिवासी असल्याचे कागदपत्रे न देता त्यांनी बनावट कागदपत्रांचा आधार घेतला. तो कशासाठी? मग ते नेमके मूळ कोठले? हे प्रश्न उपस्थित होतात. यांची चौकशी गरजेची असल्याचे सोमय्या म्हणाले.
पोलिसांचा तपास कौतुकास्पद
जळगाव शहरात 43 बनावट दाखल्यांचे प्रकरण उघडकीस आले. यासंदर्भात गुन्हा दाखल झाला. पोलिसांनी जलदगतीने तपासाला चालना दिली. मनपा, जिल्हाधिकारी आणि पोलीस यांच्या समन्वयातून बोगस दाखल्यांचा फ्रॉड पकडला गेला. दोन वकिलांना अटक केली. या फसवणूक प्रकरणामागे कोण आहे? हे तपासातून समोर येईलच. पोलिसांची ही मोठी उपलब्धी आहे, असे सांगून सोमय्या यांनी पोलिसांच्या कार्यपध्दतीचे कौतुक केले. जळगाव जिल्ह्यात अन्यत्रही या संशयास्पद प्रकारांच्या सखोल चौकशीची गरज आहे.
मालेगावात बोगस दाखला
2020 मध्ये दाखल झालेल्या एका गुन्ह्यात मालेगाव येथे पोलिसांनी सोमवारी (7 एप्रिल) एकाला अटक केली. त्याला न्यायालयात हजर केले असता त्याच्याकडे बोगस दाखला असल्याचा मामला उघडकीस आला. त्यामुळे या बनावट दाखल्यांची व्याप्ती मोठी असल्याचा दावा किरीट सोमय्या यांनी केला.
