मुंबई (10 एप्रिल 2025) : मुंबईत शहरात 26 नोव्हेंबर 2028 मध्ये झालेल्या दहशतवादी हल्ल्यात 166 नागरिकांचा बळी गेला होता. या हल्ल्यात प्रमुख आरोपी तहव्वुर हुसेन राणा विशेष विमानाने गुरुवारी भारतात दाखल झाला. दिल्लीच्या पालम विमानतळावरुन राणाला थेट राष्ट्रीय तपास संस्थेच्या (एनआयए) मुख्यालयात नेले जात आहे. एनआयए मुख्यालयात राणाची चौकशी केली जाईल. यानंतर तहव्वुर राणाला तिहार तुरुंगात ठेवण्यात येणार आहे.
पाकिस्तान म्हणाला तो तर कॅनेडियन
राणाच्या प्रत्यार्पणाबाबत पाकिस्तानकडून पहिली प्रतिक्रिया आली आहे. पाकिस्तानने तहव्वुर राणापासून स्वतःला दूर केले आहे. पाकिस्तानच्या परराष्ट्र कार्यालयाने एका निवेदनात म्हटले की, तहव्वुर राणाने गेल्या दोन दशकांत त्याच्या पाकिस्तानी कागदपत्रांचे नूतनीकरण केलेले नाही, त्यामुळे त्याचे कॅनेडियन नागरिकत्व अगदी स्पष्ट आहे.
26/11 हल्ल्यात 166 जणांचा मृत्यू
तहव्वुर राणा हा पाकिस्तानी वंशाचा कॅनेडियन नागरिक असून, 2008 च्या मुंबई दहशतवादी हल्ल्यातील मुख्य सूत्रधारांपैकी एक असलेल्या अमेरिकन नागरिक डेव्हिड कोलमनचा निकटवर्तीय होता. 26 नोव्हेंबर 2008 रोजी 10 पाकिस्तानी दहशतवाद्यांच्या गटाने मुंबईतील रेल्वे स्टेशन, दोन हॉटेल्सवर हल्ला केला होता. त्या हल्ल्यात सहा अमेरिकन नागरिकांसह एकूण 166 लोक मारले गेले होते. त्याच प्रकरणात नोव्हेंबर 2012 मध्ये पाकिस्तानी दहशतवादी अजमल कसाबला पुण्याच्या येरवडा तुरुंगात फाशी देण्यात आली.
