Beed shaken again : BJP office bearer killed by a coyote in broad daylight बीड (15 एप्रिल 2025) : बीडमधील ढासळलेल्या कायदा-सुव्यवस्थेला हादरवणारी बातमी समोर आली आहे. माजलगाव (बीड) येथे येथे भाजपच्या एका पदाधिकार्‍याची भरदुपारी धारदार कोयत्याने वार करून हत्या करण्यात आली. बाबासाहेब आगे असे हत्या झालेल्या भाजप पदाधिकार्‍याचे नाव आहे.
माजलगाव तालुक्यातील किट्टी आडगाव ग्राम पंचायतीचे सदस्य होते. ते भाजपचे विस्तारक म्हणून काम करत होते. मंगळवारी दुपारी दोन वाजेच्या सुमारास ते भाजप तालुकाध्यक्ष अरुण राऊत यांच्या भेटीसाठी माजलगाव शहरातील स्वामी समर्थ मंदिराजवळील भाजप कार्यालयात आले होते. त्यावेळी भाजप कार्यालयापुढेच कोयत्याने वार करून त्यांची निर्घृण हत्या करण्यात आली.
हत्येनंतर बराच वेळ त्यांचा मृतदेह रक्ताच्या थारोळ्यात घटनास्थळी पडून होता. त्याचा एक व्हिडिओ चांगलाच व्हायरल झाला आहे. या घटनेची माहिती मिळताच पोलिसांनी घटनास्थळी धाव घेतली.
आबासाहेब आगे यांच्या हत्येनंतर आरोपी नारायण शंकर फपाळ याने पोलिसांपुढे आत्मसमर्पण केले. तो हत्येनंतर चालत माजलगाव शहर पोलिस ठाण्यात गेला. तिथे त्याने पोलिसांना घडलेला प्रकार सांगितला. त्यानंतर पोलिसांनी गुन्हा दाखल करून त्याला ताब्यात घेतले. आरोपीने बाबासाहेब आगे यांची का हत्या केली? याचा तपास पोलिस करत आहेत. हे हत्याकांड पैशांच्या देवाणघेवाणीतून घडले असावे असा संशय व्यक्त केला जात आहे.
