Cloudburst in Kashmir in summer : Two winds नवी दिल्ली (20 एप्रिल 2025) : राज्यातील नागरिक उन्हाने होरपळत असताना तिकडे काश्मीरमध्ये मात्र ऐन उन्हाळ्यात ढगफुटी झाल्याचा प्रकार घडला असून त्यात दोघे वाहिले आहेत तर आतापर्यंत शंभर लोकांना वाचवण्यात यश आले आहे. रविवारची सकाळ येथील लोकांसाठी भयावह ठरली आहे.
अनेक घरे कोसळली असून काही लोक पाण्याच्या वेढ्यामुळे तसेच भूस्खलन झाल्याने घरातच अडकलेले आहेत. या लोकांना वाचविण्याचे काम सुरु करण्यात आले असून आतापर्यंत 100 लोकांना वाचविण्यात आले आहे.
मुसळधार पावसामुळे नाल्यातील पाणी वाढले आणि अचानक पूर आल्याचे सांगण्यात येत आहे. हे पाणी चिनाब पुलाजवळील धर्मकुंड गावात शिरले. गावात पाणी शिरल्याने संपूर्ण परिसरात भीतीचे वातावरण होते. या पाण्याच्या प्रचंड लोंढ्यामुळे 100 घरे पूर्णपणे उद्ध्वस्त झाली आहेत. परिसरात पाणी आणि चिखल असल्याने लोक घरातच अडकले आहेत.
रामबन जिल्ह्याच्या उपायुक्तांनी लोकांना सतर्क राहण्याचा सल्ला दिला आहे. या भागात खराब हवामान आहे. कोणत्याही आपत्कालीन परिस्थितीत, तुम्ही 24ु7 जिल्हा नियंत्रण कक्षाशी 01998-295500, 01998-266790 या क्रमांकांवर संपर्क साधावा, तसेच सूचनांचे पालन करावे, असे सांगितले आहे. उपायुक्तांनी एक्सवर पोस्ट शेअर केली आहे.
सध्या देशातील वातावरण बदललेले आहे. फेब्रुवारीपासून उन्हाच्या झळा प्रत्येक भागात सोसाव्या लागत आहेत. यामुळे अनेक ठिकाणी अचानक पाऊसही कोसळत आहे. खराब हवामानामुळे गेल्याच आठवड्यात दिल्लीतील अनेक विमानांची उड्डाणे रद्द करण्यात आली होती. तसेच येणारी विमाने इतरत्र वळविण्यात आली होती. महाराष्ट्रातही सर्वच भागात पाऊस झाला होता. आता पुन्हा उकडण्यास सुरुवात झाली आहे.
