पहेलगाम हल्ल्यानंतर सरकार अ‍ॅक्शन मोडवर : पाक नागरिकांचा व्हिसा व सिंधू जल करार रद्दसह घेतले पाच मोठे निर्णय

सिंधी करार रद्द
पाकिस्तानसोबतचा 1960 चा सिंधू पाणी करार तात्काळ प्रभावाने निलंबित करण्यात आला आहे. पाकिस्तान सीमापार दहशतवादाला विश्वासार्ह आणि अपरिवर्तनीयपणे पाठिंबा देणे थांबवत नाही तोपर्यंत हा करार स्थगित करण्यात आला आहे.

अटारी नाका बंद
अटारी एकात्मिक तपासणी नाका तात्काळ बंद करण्यात येत आहे. ज्यांनी वैध परवानगी घेऊन या मार्गाने सीमा ओलांडली आहे ते 1 मे 2025 पूर्वी त्याच मार्गाने परत येऊ शकतात.

एसव्हीईएस अंतर्गत आलेल्यांना सोडावा लागणार देश
पाकिस्तानी नागरिकांना सार्क व्हिसा सूट योजनेअंतर्गत भारतात प्रवास करण्याची परवानगी दिली जाणार नाही. पूर्वी जारी केलेले सर्व व्हिसा अवैध मानले जातील. सध्या एसव्हीईएस व्हिसावर भारतात असलेल्या पाकिस्तानी नागरिकांना 48 तासांच्या आत देश सोडावा लागेल.

पाकिस्तानी उच्चायुक्तालयातील अधिकार्‍यांना देश सोडण्याचे आदेश
नवी दिल्लीतील पाकिस्तान उच्चायुक्तालयातील संरक्षण, लष्करी, नौदल आणि हवाई दल सल्लागारांना पर्सना नॉन ग्राटा घोषित करण्यात आले आहे. त्यांना भारत सोडण्यासाठी 7 दिवसांची मुदत देण्यात आली आहे.

उच्चायोगांमध्ये ही पदे रद्द
भारत इस्लामाबादमधील भारतीय उच्चायुक्तालयातून त्यांचे संरक्षण, नौदल आणि हवाई दल सल्लागार मागे घेत आहे. संबंधित उच्चायोगांमध्ये ही पदे रद्द मानली जातील.

दहशतवाद्यांचे छायाचित्र जारी
सुरक्षा आणि गुप्तचर संस्थांनी पहलगाम हल्ल्यातील संशयित दहशतवाद्यांचे रेखाचित्र जारी केले आहेत. त्यांची नावे आसिफ फौजी, सुलेमान शाह आणि अबू तल्हा असल्याचे सांगण्यात आले आहे.

गुप्तचर सूत्रांनी सांगितले की, हल्ल्याचा मास्टरमाइंड लष्कर-ए-तैयबाचा उपप्रमुख सैफुल्ला खालिद आहे, जो पाकिस्तानात उपस्थित आहे. प्राथमिक तपासात या हल्ल्यात पाच दहशतवादी सहभागी असल्याचे समोर आले आहे. यापैकी दोन स्थानिक आणि तीन पाकिस्तानी दहशतवादी होते.