विमान कंपन्यांचा आडमुठेपणा : श्रीनगर ते मुंबईचे भाडे तब्बल 55 हजार
डीजीसीएच्या पत्रानंतर भाडेवाढ मागे : चार अतिरिक्त विमानांचीही सोय
Airline companies’ stubbornness: Srinagar to Mumbai fare is as high as Rs 55,000 मुंबई (24 एप्रिल 2025) : जम्मू काश्मिरातील पहेलगाममध्ये झालेल्या दहशतवादी हल्ल्यानंतर पर्यटकांनी घराकडे परतण्यासाठी गर्दी केली आहे मात्र या संधीचा फायदा विमान कंपन्यांनी घेत 8 ते 15 हजारांपर्यंत असलेले श्रीनगर ते मुंबई विमान तिकीट बुधवारी तब्बल 55 हजार रुपयांपर्यंत वाढवल्याने संतापाची भावना व्यक्त झाली तर सोशल मिडीयावरही त्याचा उद्रेक दिसून आला. याबाबत डीजीसीएने पत्र काढून सर्व विमान कंपन्यांना भाडेवाढ न करण्याचे आदेश दिल्यानंतर सायंकाळी चारच्या सुमारास कंपन्यांनी नियमित दरानेच तिकीट बुकिंग सुरू करण्यात आले.
विमान सेवेवर वाढला ताण
दहशतवादी हल्ल्यानंतर बहुतांश पर्यटकांनी पुढील पर्यटन सोडून तातडीने आपापल्या गावी परतण्याचे नियोजन केले त्यामुळे विमानसेवेवरही ताण आला. अचानक श्रीनगर ते मुंबई बुकिंगसाठी पर्यटकांच्या उड्या पडू लागताच विमान कंपन्यांनीही अव्वाच्या सव्वा भाडेवाढ केली. दुपारपर्यंत विमान कंपन्यांच्या अधिकृत संकेतस्थळांवर सरासरी 40 ते 50 हजार रुपयांपर्यंतचे प्रतिप्रवासी तिकीट दर होते. एका कंपनीने तर तब्बल 55 हजार रुपये दर केला. याबाबत नागरिकांनी सोशल मीडियावर संताप व्यक्त करायला सुरुवात केली. त्यानंतर डीजीसीएने सर्व विमान कंपन्यांसाठी एक पत्र जारी करत काही सूचना केल्या. त्यामध्ये भाडेवाढ करू नये, तसेच तिकीट रद्द किंवा रिशेड्युलिंगसाठी शुल्क आकारू नये, विमानांची उड्डाणे वाढवावीत, असे या पत्रामध्ये म्हटले. त्यानंतर विमान कंपन्या ताळ्यावर आल्या व भाडेवाढ मागे घेतली.
मुंबईहून काश्मीरसाठी साडेचार हजार भाडे
हल्ल्यानंतर काश्मीरला जाणार्यांची संख्या घटली तर तिकडून मुंबईत येणार्यांची प्रचंड वाढली. त्यामुळे आपसूकच विमान कंपन्यांनी प्रवाशांना आकर्षित करण्यासाठी मुंबईतून श्रीनगरला जाण्यासाठी केवळ साडेचार हजार रुपयांपासून तिकीट दर ठेवले होते. याउलट श्रीनगरहून मुंबईला येण्यासाठी 6 ते 18 हजार रुपयांपर्यंतचे दर होते.
