What can you say ! MLA arrested while taking a bribe of 20 lakhs! नवी दिल्ली (5 मे 2025) : शासकीय कार्यालयातील लाचखोरी नवीन नाही मात्र चक्क आमदारालाच लाच घेताना अटक झाल्याची बातमी आल्यास निश्चितच सर्वसामान्यांसाठी ही बाब धक्कादायक ठरते. झाले असे की, राजस्थानमधील बांसवाडा येथील भारत आदिवासी पक्षाचे आमदार जय कृष्ण पटेल यांनी खाणकाम करणार्‍या कंपनीला सतत त्रास देत कंपनीकडून 10 कोटी रुपयांची मागणी केली व 20 लाख रुपयांची लाच घेताच त्यांना सापळा रचून असलेल्या एसीबीने अटक केली.
एसीबीचे महासंचालक डॉक्टर रवि प्रकाश मेहरडा यांनी सांगितलं की, खाणकाम व्यावसायिक रविंद्र सिंह यांनी 4 एप्रिल रोजी तक्रार दिली होती की, आमदाराने खाणीशी संबंधित प्रश्न विधानसभेत उपस्थित केले. त्यानंतर ते हटवण्यासाठी 10 कोटींची मागणी केली. शेवटी तडजोड करून अडीच कोटी घेण्यास आमदार तयार झाले.
रविंद्र सिंह यांनी येथील आमदार जय कृष्ण पटेल यानं पहिला हप्ता म्हणून एक लाख रुपये रोख दिले. त्यानंतर एसीबीने पाळत ठेवण्यास सुरुवात केली आणि पुरावे गोळा केले. 20 लाख रुपयांचा पुढचा हप्ता जयपूर येथील आमदार निवासस्थानी देण्यात येणार होता. सापळ्याच्या दिवशी, आमदार स्वतः जयपूरला पोहोचले आणि त्यांनी रंगीत नोटांनी भरलेली बॅग स्वीकारली आणि नंतर त्यांच्या बोटांवरही तोच रंग आढळला.
तांत्रिक पुराव्यांसह, एसीबीने दावा केला की नोटांवर विशेष शाई लावण्यात आली होती. ऑडिओ, व्हिडिओ आणि छायाचित्रे घेण्यात आली. बॅग उचलताना आमदाराच्या बोटांवर शाई आढळली. आमदाराच्या वतीने पैसे घेणारी व्यक्ती घटनास्थळावरून फरार झाली आहे. एसीबीचा दावा आहे की, त्यांच्याकडे या व्यक्तीचे रेकॉर्डिंग आहे, ज्यामध्ये तो पैसे घेताना दिसत आहे. या प्रकरणाबद्दल आमदाराची चौकशी केली जात आहे. एसीबीचे म्हणणे आहे की या प्रकरणात आणखी लोकांचा सहभाग समोर येऊ शकतो.
कोण आहेत जयकृष्ण पटेल ?
जयकृष्ण पटेल हे बांसवाडाच्या आनंदपुरी तहसीलमधील कनेला गावचे रहिवासी आहेत. पटेल त्यांच्या महाविद्यालयीन काळापासून राजकारणात सक्रिय आहेत. जयकृष्ण पटेल यांनी 2023 मध्ये विधानसभा निवडणूकही लढवली होती, जिथे त्यांना पराभवाचा सामना करावा लागला होता.
जयकृष्ण पटेल यांनी पोटनिवडणुकीत भारत आदिवासी पक्षाकडून निवडणूक जिंकली. या निवडणुकीत त्यांना 1,22,573 मते मिळाली तर भारतीय जनता पक्षाचे उमेदवार सुभाष तांबोलिया यांना 71,139 मते मिळाली. येथे पटेल यांनी 50 हजारांहून अधिक मतांनी निवडणूक जिंकली होती.
