Speeding Bolero hits car: Adult dies in Jalgaon जळगाव (11 मे 2025) : भरधाव बोलेरो कारवर धडकून झालेल्या अपघातात जळगावातील प्रौढाचा मृत्यू झाला तर त्यांची मुलगी आणि आणखी एक व्यक्ती गंभीर जखमी झाला. हा अपघात पिंप्री गावाजवळ घडला. . या अपघातात महेश सुरेश सोनार (55, रा.रामेश्वर कॉलनी, जळगाव) यांचा मृत्यू झाला.
नातेवाईकांनी दिलेल्या माहितीनुसार, महेश सोनार हे रामेश्वर कॉलनीत पत्नी आणि दोन मुलींसोबत राहत होते आणि पाण्याचे जार वाटपाचा व्यवसाय करून आपला उदरनिर्वाह चालवत होते.
अमळनेर येथे त्यांची मुलगी नैनाची एमबीएच-सीईटीची परीक्षा होती त्यामुळे ते आपली मुलगी नैना आणि राजेश मिठूलाल धूत (46) यांच्यासोबत कारने अमळनेरला गेले होते. परीक्षा संपवून ते दोघे मुलीसह जळगावकडे परत येत असताना, काल दुपारी दीड वाजेच्या सुमारास पिंप्री गावाजवळ त्यांच्या कारला समोरून आलेल्या एका बोलेरो पिकअप वाहनाने जबर धडक दिली. या भीषण अपघातात महेश सोनार यांचा मृत्यू झाला, तर त्यांची मुलगी नैना आणि सोबत असलेले राजेश धूत गंभीररित्या जखमी झाले.
याच रस्त्यावरून खासदार स्मिता वाघ अमळनेरकडे जात असतांना त्यांना अपघात झाल्याचे दिसून आले. कारमधील सर्वजण जळगावातील रामेश्वर कॉलनीतील असल्याचे समजल्यानंतर त्यांनी त्या परिसरातील माजी नगरसेवक राजेंद्र घुगे पाटील यांच्याशी संपर्क साधून माहिती दिली. त्यानुसार मयतांच्या नातेवाईकांना अपघात झाल्याची माहिती देण्यात आले. जखमींना जळगावच्या शासकीय वैद्यकीय महाविद्यालयात उपचारासाठी दाखल करण्यात आले. रुग्णालयात पोहोचताच नातेवाईकांनी एकच आक्रोश केला.
