राजशिष्टाचार न पाळल्याने सरन्यायाधीशांची नोकरशाहीला चपराक
दिली प्रोटोकॉल, अनुच्छेद 142 ची आठवण : सरन्यायाधीशांच्या नाराजीनंतर तिन्ही अधिकार्‍यांची दिलगिरी व्यक्त
Chief Justice slaps bureaucracy for not following royal etiquette मुंबई (19 मे 2025) : न्यायपालिकेची सूत्रे स्वीकारल्यानंतर रविवारी पहिल्यांदाच महाराष्ट्र दौर्‍यावर आलेल्या देशाचे नवनिर्वाचित सरन्यायाधीश भूषण गवई यांच्या स्वागताला प्रशासनामधील एकही अधिकारी उपस्थित नसल्याने न्यायमुर्ती गवई यांनी आपल्या भाषणात राजशिष्टाचार न पाळल्याचा मुद्दा उपस्थित करून नोकरशाहीला चपराक दिली.
विविध मान्यवरांची उपस्थिती
सर्वोच्च न्यायालयाच्या 52 व्या सरन्यायाधीशपदी भूषण गवई यांची निवड झाल्याने महाराष्ट्र आणि गोवा बार काऊन्सिलतर्फे त्यांचा सत्कार करण्यात आला. मुंबईत झालेल्या कार्यक्रमाला सर्वोच्च न्यायालयातील न्यायमुर्ती दीपांकर दत्ता, न्यायमूर्ती सुर्यकांत, मुंबई उच्च न्यायालयातील न्यायमुर्ती आलोक आराध्य, न्या. अभय ओक, न्या. रेवती डेरे, न्या. प्रसन्न वराळे, केरळ उच्च न्यायालयाचे मुख्य न्यायाधीश नितीन जामदार यांच्यासह विविध मान्यवर उपस्थित होते. परंतु अधोरेखित करण्यासारखी बाब म्हणजे ज्या महाराष्ट्रातून सरन्यायाधीश भूषण गवई येतात, त्या महाराष्ट्राच्या मुख्य सचिव आणि राज्याच्या पोलीस महासंचालक यांनी या कार्यक्रमाला दांडी मारली. हीच बाब सरन्यायाधीश गवई योंना खटकली. त्यांनी जाहीर भाषणातून याविषयी नाराजी व्यक्त केली.
माझ्या जागी अन्य कुणी असता तर…
प्रोटोकॉलचे पालन करण्याचा आग्रह मी धरत नाही. इतक्या किरकोळ बाबींमध्ये पडायचे नसले तरी लोकांना त्याबाबत माहिती म्हणून हे नमूद करत आहे.
माझ्या जागी अन्य कोणी असते, तर राज्यघटनेचा अनुच्छेद 142 चा वापर केला असता, असेही न्या. गवई यांनी म्हटले. सर्वोच्च न्यायालय या अंतर्गत कोणत्याही व्यक्तीला न्यायालयात उपस्थित राहण्याचा आदेश देऊ शकते.
अभिवादन केल्यानंतर सरन्यायाधीश गवई यांनी प्रतिक्रिया दिली की, ‘जे झाले, ते मी कळवले. माझी प्रोटोकॉलबाबत कोणतीही तक्रार नाही.’
आव्हाड यांनी उपस्थित केली वेगळीच शंका
न्या. गवई यांच्या अवमानाचा मुद्दा तापलेला असताना राष्ट्रवादीचे नेते जितेंद्र आव्हाड यांनी एक्स पोस्ट करून यामागे जातीचे कारण असल्याची शंका उपस्थित केली आहे. एक्स पोस्ट करून त्यांनी प्रशासनावर टीका केली आहे.
