धुळ्यासह सावदा, लासलगाव, देवळाली, मुर्तीजापूर स्थानकांचे उद्या पंतप्रधान मोदींच्या हस्ते ऑनलाईन लोकार्पण

Dhule, Savda, Lasalgaon, Devlali, Murtijapur stations to be inaugurated online by Prime Minister Modi tomorrow भुसावळ (21 मे 2025) : मध्य रेल्वेच्या भुसावळ विभागातील सावदा, धुळे, लासलगाव, देवळाली व मुर्तीजापूर या रेल्वे स्थानकांचे अद्यावतीकरण करण्यात आले आहे. विकासकामांचे उदघाटन पंतप्रधान नरेद्र मोदी यांच्या हस्ते गुरुवार, 22 रोजी सकाळी 9.30 वाजता ऑनलाईन होणार आहे. रेल्वे प्रशासनातर्फे कामांना वेग देण्यात आला आहे. लोकार्पणाच्या दिवशी संबंधित रेल्वे स्थानकांवर अधिकारी नियुक्त करण्यात आले आहे.

प्रवाशांना अधिकाधिक सुविधा
विभागातील लासलगाव, देवलाली, सावदा आणि धुळे या प्रमुख रेल्वे स्थानकांवर प्रवाशांच्या सोयीसुविधांमध्ये भरीव वाढ करण्यात आली आहे. रेल्वे प्रशासनाने या स्थानकांचा विकास करून प्रवाशांना अधिक आरामदायी आणि सुरक्षित अनुभव देण्याचा प्रयत्न केला आहे.

लासलगाव स्थानकाचा कायापालट
लासलगाव स्थानकावर प्रवाशांसाठी नवीन बुकिंग कार्यालय, आरक्षण केंद्र आणि प्लॅटफॉर्मचे नूतनीकरण करण्यात आले आहे. प्रवाशांना पिण्याच्या पाण्याची सोय तसेच प्लॅटफॉर्मवर शेड, पंखे आणि दिव्यांची व्यवस्था केली आहे. उद्घोषणा प्रणालीमुळे गाड्यांची अद्ययावत माहिती उपलब्ध होणार आहे. प्रथम श्रेणीतील प्रवाशांसाठी नवीन प्रतीक्षा कक्ष आणि कोच इंडिकेटर सिस्टीम लावण्यात आली आहे. स्थानकाच्या परिसरातील फिरण्याची जागा विकसित करण्यात आली आहे. बसण्यासाठी स्टेनलेस स्टील आणि ग्रॅनाइटचे बेंच बसवण्यात आले आहेत. लवकरच येथे निवृत्ती कक्षही सुरू करण्यात येणार आहे.

देवळाली स्थानकावर आधुनिक सुविधा
देवळाली स्थानकावर प्रवाशांसाठी परिभ्रमण क्षेत्र आणि पार्किंगची व्यवस्था सुधारण्यात आली आहे. नवीन प्रवेशद्वार आणि प्लॅटफॉर्मची दुरुस्ती केली आहे. त्यावर छत लावले आहे. दिव्यांग प्रवाशांसाठी विशेष शौचालय आणि पिण्याच्या पाण्याची सोय केली आहे. नवीन बुकिंग ऑफिस, सुंदर बाग आणि वातानुकूलित प्रतीक्षालयामुळे प्रवाशांना अधिक आराम मिळेल. लिफ्टची सोय तसेच नवीन वीजपुरवठा यंत्रणा बसवण्यात आली आहे. स्थानकावर नवीन दिशादर्शक फलक आणि त्रिभाषिक नामफलक लावण्यात आले आहेत.

सावदा स्थानकावर स्वच्छता आणि सोयीवर भर
भुसावळ विभागातील सावदा स्थानकावर आधुनिक उद्घोषणा प्रणाली, कोच डिस्प्ले बोर्ड आणि प्लॅटफॉर्म इंडिकेटर बोर्ड लावण्यात आले आहेत. महिला, पुरुष आणि दिव्यांग प्रवाशांसाठी स्वतंत्र शौचालये बांधण्यात आली आहेत. पिण्याच्या पाण्यासाठी वॉटर कूलरची व्यवस्था करण्यात आली असून बसण्यासाठी नवीन बेंच आणि प्रतीक्षालय तयार करण्यात आले आहे. प्लॅटफॉर्मवर ग्रॅनाइट फिटिंग करण्यात आले असून स्थानकावर कचराकुंड्या बसवण्यात आल्या आहेत. प्रवाशांच्या सुरक्षित हालचालीसाठी फूट ओव्हर ब्रिजवर शेडची व्यवस्था करण्यात आली आहे.

धुळे स्थानकाचे सौंदर्य आणि सुविधांमध्ये वाढ
धुळे स्थानकावर प्लॅटफॉर्म आणि परिसरातील फ्लोअरिंग बदलण्यात आले असून जागा वाढवण्यात आली आहे. नवीन शौचालय, प्रतीक्षालय आणि बुकिंग कार्यालयामुळे प्रवाशांची सोय झाली आहे. हेरिटेज नॅरो गेज कोचमध्ये खास बुकिंग ऑफिस तयार करण्यात आले आहे, जे प्रवाशांना एक वेगळा अनुभव देईल. स्थानकावर आकर्षक बाग आणि सजावटीची प्रकाशयोजना करण्यात आली आहे. व्हीआयपी कक्ष आणि कर्मचार्‍यांच्या कार्यालयांचे नूतनीकरण करण्यात आले असून लवकरच नवीन इलेक्ट्रिक सबस्टेशन कार्यान्वित होणार आहे.

एकंदरीत, पश्चिम महाराष्ट्रातील या चारही रेल्वे स्थानकांवर करण्यात आलेल्या सुधारणांमुळे प्रवाशांना अधिक चांगली आणि सोयीस्कर रेल्वे यात्रा अनुभवता येणार आहे. रेल्वे प्रशासनाच्या या प्रयत्नांचे प्रवाशांकडून स्वागत होत आहे.