धुळ्यात सैतान पतीने पत्नीची पेस्टीसाईडचे इंजेक्शन देत केली हत्या
विवाहितेचा मृत्यू होईपर्यंत तो मृतदेहाजवळच बसला : आरोपी पती, प्रेयसीसह पाच संशयीतांना अटक
In Dhule, a devilish husband killed his wife by injecting her with pesticide. धुळे (31 मे 2025) : कॉलेजमध्ये शिक्षण घेत असताना बहरलेले प्रेम लग्नानंतर पुन्हा बहरले मात्र त्याचे लग्न झालेले तर ती पतीपासून विभक्त झाली असल्याने पत्नीचा अडसर दूर करण्यासाठी मिलिटरीत क्लर्क असलेल्या नराधम पतीने चक्क पत्नीला पेस्टीसाईडचे इंजेक्शन देवून ठार केले. या कृत्यात कुटूंबियांनीही साथ दिल्याने प्रेयसीसह पाच जणांविरोधात गुन्हा दाखल करून आरोपींना अटक करण्यात आली. शारदा उर्फ पूजा कपिल बागुल (वय 38 रा. प्लॉट नं.15 (ब), साईशिल्प, वक्रतुंड विहार वलवाडी, देवपूर, धुळे) असे खून झालेल्या विवाहितेचे नाव आहे.
मिलिटरीतील पतीने केला पत्नीचा खून
आरोपी कपिल बाळू बागुल (43) हा मिलिटरीमध्ये क्लर्क आहे. 2010 मध्ये त्याचे पूजा बागुल या विवाहितेसोबत लग्न होवून त्यांच्या संसार वेलीवर मुलगा व मुलगी ही दोन फुले उमेजली मात्र संशयीत कपिल हा जयहिंद महाविद्यालयात शिक्षण घेत असताना त्याचे प्रज्ञा कार्डीले सोबत प्रेम जुळले मात्र काही कारणास्तव तिचा विवाह अन्य इसमाशी होवून तिलादेखील दोन मुली झाल्या व त्यांचे आज वय 17 व 13 वर्ष आहे. काही महिन्यांपूर्वी दोघांची भेट झाली अन् प्रेम फुलल्यानंतर त्यांच्यात भेटी सुरू झाल्या. प्रेमाच्या नात्यात पत्नी शारदा अडसर ठरू पाहत असल्याने आरोपी पतीने कीटकनाशकाचे इंजेक्शन पत्नीला दिले तर अन्य आरोपीला तिचे हात-पाय पकडले.
मृत्यू होईपर्यंत तो पाहतच राहिला
इंजेक्शन दिल्यानंतर शारदाच्या तोंडातून फेस येऊ लागला व वेदनेने ती तळमळत असतानाही आरोपी पती कपिल 1.30 तास तिचा मृत्यू होईस्तोवर तिच्याकडे एकटक पाहतच बसला. पत्नीचा मृत्यू झाल्यानंतर तिला श्री गणेश हॉस्पिटलमध्ये नेले मात्र हॉस्पिटलने जिल्हा रुग्णालयात नेण्यास सांगितल्यानंतर आरोपीने इतर चौघांच्या मदतीने तिच्या अंत्यविधीची तयारी केली. याबाबत पश्चिम देवपूर पोलिसांना माहिती कळताच पूजाचा मृतदेहाचे शवविच्छेदन करण्यात आल्यानंतर तिचा विषारी इंजेक्शन देवून खून करण्यात आल्याचे स्पष्ट झाले.
आरोपींविरोधात खुनाचा गुन्हा
मयत पूजाचा भाऊ भुषण शिवाजी महाजन (35. भोसले पार्क, कोठली रोड, भडगाव) यांनी दिलेल्या फिर्यादीवरुन पश्चिम देवपूर पोलीस ठाण्यात पती कपिल बाळू बागुल, सासरे बाळु बुधा बागुल, सासू विजया बाळु बागुल, नणंद रंजना धनेश माळी व कपिलची प्रेयसी प्रज्ञा महेश कर्डीले (रा.शनी मंदीराजवळ, वाडीभोकर रोड. देवपूर, धुळे) यांच्याविरुद्ध गुन्हा दाखल करण्यात आला आहे. पोलिसांनी चौघांना अटक केली. तपास सहाय्यक पोलीस निरीक्षक तुषार देवरे यांच्या मार्गदर्शनाखाली उपनिरीक्षक साईनाथ तळेकर करीत आहेत.
अनैतिक संबंधास विरोध केल्याचा राग
प्लॉट घेण्यासाठी माहेरुन दोन लाख आणावेत म्हणून पूजाच छळ करण्यात आला तसेच पती कपिल बागुल याचे प्रज्ञा महेश कर्डीले हिच्याशी अनैतिक संबंध असल्याची माहिती पत्नीला झाल्यानंतर तिने विरोध केल्याच्या रागातून सासरे बाळु बुधा बागुल, नणंद रंजना धनेश माळी व प्रज्ञा महेश कर्डीले यांनी कपिल बागुल व सासू विजया बागुल यांना चिथावणी व प्रेरणा दिल्यामुळे कपिल बागुल व त्यांची आई विजया बागुल यांनी पूजा हिच्यावर विष प्रयोग केला व डोक्यावर काहीतरी मारून तिचा खून करण्यात आल्याचे तक्रारीत नमूद आहे.
