धुळे प्रांताधिकार्‍यांच्या नावाने लाच मागणार्‍या खाजगी पंटराला आठ दिवसांची पोलिस कोठडी
आतापर्यंतच्या सापळ्यांमध्ये सर्वाधिक पोलिस कोठडी : अधिकार्‍यांच्या अडचणी वाढणार !
Private punter who demanded bribe in the name of Dhule provincial officials remanded in eight-day police custody धुळे (3 जून 2025) : धुळे प्रांताधिकार्‍यांसह नायब तहसीलदारांच्या नावाने लाच मागणार्‍या खाजगी पंटराला धुळे एसीबीने सोमवारी सायंकाळी रेल्वे स्थानकाच्या प्रवेशद्वाराजवळ अटक केली होती. संशयीताला धुळे न्यायालयात हजर केले असता आठ दिवसांची पोलिस कोठडी सुनावण्यात आली. वाल्मिक प्रतापसिंग झाल्टे (राजपुत)असे कोठडी सुनावण्यात आलेल्या आरोपीचे नाव आहे.
असे आहे लाच प्रकरण
तक्रारदाराच्या नातु व नातीचे भामटा राजपुत या जातीचे जात प्रमाणपत्र मिळण्याकरीता 16 नोव्हेंबर 2024 रोजी आवश्यक त्या कागदपत्रासह ऑनलाईन अर्ज करण्यात आला व पोहोच पावतीही घेण्यात आली. या बाबीला सुमारे सहा महिन्याचा कालावधी होवून देखील तक्रारदाराला प्रमाणपत्र मिळाले नसल्याने त्यांनी 30 मे 2025 रोजी उपविभागीय अधिकारी यांची भेट घेण्याचा प्रयत्न केला असता त्यांची भेट झाली नाही मात्र कार्यालयात पंटर वाल्मिक झाल्टे हे भेटले. त्यांनी तक्रारदाराला उपविभागीय कार्यालयात त्यांचे सर्वांशी चांगले संबंध असल्याचे व त्यांच्या मार्फतच पैसे घेवून लोकांची कामे होत असल्याचे सांगितले. भामटा राजपूत जातीच्या प्रत्येक दाखल्याचे प्रत्येकी 15 हजार रुपयांप्रमाणे 30 हजार रुपये द्यावे लागतील, असे सांगून त्यांनी प्रांताधिकारी, नायब तहसीलदार संजय शिंदे व कार्यालयातील कर्मचारी हे माझ्याकडुन पैसे घेवून तुमचे काम करुन देतील, ते प्रत्यक्ष तुम्हाला भेटणार नाहीत, असे सांगितल्याची तक्रारदाराने तक्रार दिली होती. एसीबीने लाच पडताळणी केल्यानंतर सापळा रचण्यात आला व सोमवारी सायंकाळी उशिरा धुळे रेल्वे स्टेशनच्या प्रवेशव्दारासमोर पंचासमक्ष खाजगी पंटर वाल्मीक झाल्टे यास लाच घेताना धुळे एसीबीने पकडले.
अधिकार्‍यांच्या वाढल्या अडचणी
खाजगी पंटराने अधिकार्‍यांच्या नावाने लाच मागितल्याने आता अधिकार्‍यांच्या अडचणीत वाढ झाल्याचे बोलले जात आहे. संशयीत आरोपीला न्यायालयाने आठ दिवसांची पोलिस कोठडी सुनावल्याने कोठडीत तो काय-काय माहिती देतो ? याकडे लक्ष लागले आहे. आरोपी झाल्टेचे आतापर्यंत कॉल्स डिटेल्स काढण्यात येणार असून तो यापूर्वी कुणा-कुणाच्या संपर्कात आला याचीदेखील माहिती काढण्यात येणार असल्याचे तपासाधिकारी व पोलीस उपअधीक्षक सचिन साळुंखे म्हणाले.
