यावल (9 जून 2025) : यावल तालुक्यातील थोरगव्हाण-पिळोदे रस्त्यावर अवैध वाळू वाहतूक करणारे ट्रॅक्टर महसुलच्या पथकाने पकडले. ही कारवाई शुक्रवारी करण्यात आली. ट्रॅक्टर मालकास दंडाची नोटीस बजावण्यात आली.
साकळी महसूल मंडळाचे गस्ती पथक मंडळ अधिकारी सचिन जगताप यांच्या मार्गदर्शनाखाली शुक्रवारी गस्तीवर होते. गस्तीवर असलेल्या महसूल सेवक गणेश महाजन (साकळी), विजय भालेराव (मनवेल), आणि विकास सोळंके (न्हावी, प्र.अडावद) यांना थोरगव्हाण-पिळोदे रस्त्यावर अवैद्य वाळू वाहतूक करणारे ट्रॅक्टर (क्रमांक एम.एच.19 बीजी 3495) हा दिसला. त्यांनी पाठलाग करून ट्रॅक्टर थांबवले असता ट्रॅक्टर चालकाकडे वाळु वाहतुकीचा परवाना नसल्याने घटनास्थळी पंचनामा करीत ट्रॅक्टर यावल तहसील कार्यालयात लावण्यात आले. ट्रॅक्टर मालक किरण बळीराम सैंदाणे यांना तहसीलदार मोहनमाला नाझीरकर यांच्या वतीने दंडाची नोटीस बजावण्यात आली. कारवाईदरम्यान दहिगाव येथील ग्राम महसूल अधिकारी मिलिंद कुरकुरे, महसूल सेवक विजय साळवे, रामा कोळी, अरविंद बोरसे यांच्यासह पोलिस विभागाकडून मदत लाभली.
