मुंबई (14 जून 2025) : उद्धव ठाकरे गटाचे खासदार संजय राऊत यांनी अहमदाबाद विमान अपघातात सायबर हल्ल्याची भीती व्यक्त केली आहे. हा अपघात अहमदाबाद येथेच कसा झाला? या विमानतळाची देखरेख करण्याची जबाबदारी कोणाकडे आहे? असा प्रश्न देखील राऊत यांनी उपस्थित केला. या माध्यमातून संजय राऊत यांनी विमान अपघाताच्या प्रकरणात केंद्र सरकारला कोंडीत पकडण्याचा प्रयत्न केला.
अहमदाबाद विमानतळावर म्हणजे ज्या ठिकाणाहून अपघातग्रस्त विमान उडवण्यासाठी परवानगी दिली, त्याचा मेंटेनन्स आणि इंजिनिअरिंग संदर्भात काही शंका माझ्या मनात असल्याचे संजय राऊत यांनी म्हटले आहे. ज्यांच्याकडून विमानाच्या सुरक्षेच्या बाबतीत आपण सर्वात जास्त अपेक्षा करतो त्या डीजीसीएमध्ये क्षमतेपेक्षा 56 टक्के कर्मचारी कमी असल्याचा दावादेखील राऊत यांनी केला आहे. इतकेच नाही तर अहमदाबाद विमानतळ कोणाच्या ताब्यात आहे? याच्या मेंटेनन्सची जबाबदारी कोणावर आहे? असे प्रश्न राऊत यांनी उपस्थित केले. या सर्व बाबतीत लोकांच्या मनामध्ये संशय आहे. हा संशय असाच राहिला तर विमानातून प्रवास करणार्‍यांची संख्या घटेल, अशी भीतीदेखील राऊत यांनी व्यक्त केली.
संजय राऊत यांनी उपस्थित केले अनेक प्रश्न
अहमदाबाद विमानतळ कोणाच्या ताब्यात आहे?
याच्या मेंटेनन्सची जबाबदारी कोणावर आहे?
सायबर हल्ल्याच्या माध्यमातून इंजिन बंद पडले का?
30 सेकंदात विमान कसे पडले?
विमानतळावर सहज कोणाला प्रवेश कसा मिळू शकतो?
अहमदाबादच का निवडले?
अहमदाबादलाच का अपघात झाला ?
भारतावरील सायबर हल्ल्यांमध्ये वाढ
संजय राऊत यांनी विमान अपघातासंदर्भात अनेक प्रश्न उपस्थित करुन देशावरील सायबर हल्ल्यांत झालेल्या वाढीवर देखील चिंता व्यक्त केली आहे. पहलगाम येथील हल्ल्यानंतर देशावरील सायबर हल्ल्यात वाढ झाली असल्याचे संजय राऊत यांनी म्हटले आहे. विमान अपघातात अशा हल्ल्याची शंका येत असल्याचेही ते म्हणाले.
