गुड्ड्या हत्या प्रकरणातील दोघा संशयीतांना धुळे शहरात प्रवेश बंदी

दोघांना शहरात प्रवेश बंदी
दोन्ही हल्लेखोर नाशिक कारागृहातून धुळ्यात आले असता साथीदारांनी जोरदार स्वागत केले. यासंदर्भातील चित्रीकरण आणि छायाचित्रे समाज माध्यमात झळकल्यानंतर दोन्ही गुन्हेगारांना धुळे शहरात प्रवेश करण्यास बंदी घालण्यात आली.

या दोन्ही गुन्हेगारांनी न्यायालयातील खटल्यासाठी निश्चित केलेल्या तारखांशिवाय अन्य दिवशी धुळे शहरात प्रवेश करु नये, शहरात यायचे असेल तर त्यांना धुळे जिल्हा सत्र न्यायाधीशांची पूर्वपरवानगी घेणे बंधनकारक करण्यात आले आहे. विजय गोयर ऊर्फ बडा पापा आणि विक्रम ऊर्फ विक्की गोयर हे शहरात कुठेही कुणाला दिसल्यास स्थानिक पोलिस ठाणे किंवा 112 या क्रमांकावर माहिती द्यावी, माहिती देणार्‍याचे नाव गुप्त ठेवण्यात येईल, असे आवाहन पोलिसांकडून करण्यात आले आहे.

दोघांविरुध्द अनेक गुन्हे
पोलिसांच्या नोंदीत विजय आणि विक्रम गोयर हे दोन्ही सराईत गुन्हेगार आहेत. दोघा संशयितांविरुध्द वेगवेगळ्या पोलीस ठाण्यात हत्या, दरोडा, चोरी, घरफोडी, दंगल, मारामारी, जिवे मारण्याचा प्रयत्न, कट रचणे किंवा दुखापत करणे यासारखे गंभीर गुन्हे दाखल आहेत. विजयविरुद्ध विविध स्वरूपाचे 12 तर विक्रमविरुद्ध 17 गुन्हे दाखल आहेत.