धुळ्यातील दिड कोटींच्या दरोड्याची उकल : गुजरातच्या चौकडीला अटक
धुळे तालुका पोलिसांची मोठी कामगिरी ः पडद्यामागील आरोपींचा कसून शोध
Dhule robbery of Rs 2.5 crore solved : Gujarat quartet arrested धुळे (10 जुलै 2025) : धुळ्यानजीक कारमधून जाणार्‍या दोघांना चाकूचा धाक दाखवत आठ दरोडेखोरांनी दिड कोटींची रक्कम लुटल्याची घटना शनिवार, 5 जुलै रोजी घडली होती. धुळे तालुका पोलिसात या प्रकरणी गुन्हा दाखल करण्यात आल्यानंतर कसून सुरू असलेल्या तपासानंतर या प्रकरणात तक्रारदारासोबत असलेला सहचालकच आरोपी निघाला असून त्याच्या जवाबानंतर चौकडीला बेड्या ठोकण्यात आल्या आहेत शिवाय गुन्ह्यातील 42 लाखांची रोकडही जप्त करण्यात आली आहे. या कारवाईनंतर पोलिस दलाचे सर्वत्र कौतुक होत आहे.
काय घडले धुळे शहरात
सुरत येथील कल्पेश रमणभाई पटेल (46) व भरत जीवनभाई भालीया (42) हे स्कॉर्पिओ द्वारे दिड कोटींची रक्कम घेवून धुळेमार्गे नाशिककडे स्वीप्ट कार (एम.एच.04. डी. वाय. 2964) ने 5 जुलै रोजी पहाटे जात असताना पाच वाजेच्या सुमारास जात असताना पूरमेपाडा उड्डाणपुलाजवळ एक कार आडवी आली व नंतर आणखी एक दुसरी कार आली. यावेळी दरोडेखोरांनी चाकूचा धाक दाखवून वाहनील रोकड लूटली. सुरूवातीला ही रक्कम चार कोटींची असल्याचा दावा संबंधितानी केला मात्र तक्रार देताना ही रक्कम दिड कोटी असल्याचे नमूद करण्यात आले.
पोलिसांनी केली गुन्ह्याची उकल
धुळे तालुका पोलिसांनी या गुन्ह्याचा बारकाईने अभ्यास केला तसेच कल्पेश पटेल यांच्यासोबत असलेला सहचालक तपासादरम्यान गायब झाल्याने त्याच्यावर संशय बळावला व तो घरी येताच पथकाने त्यास ताब्यात घेत बोलते करताच त्याने गुन्ह्यात सहभागाची कबुली देत अन्य तिघांची नावे सांगितल्याने त्यांना 9 रोजी अटक करण्यात आली तसेच चौघा आरोपींच्या घरातून 42 लाखांची रोकड जप्त करण्यात आली. आरोपींना 9 रोजी न्यायालयात हजर केल्यानंतर 16 पर्यंत पोलिस कोठडी सुनावण्यात आली.
पडद्यामागील टोळीचा शोध
या गुन्ह्यात मोठी टोळी सहभागी असून आरोपी अंडरग्राउंड झाल्याने त्यांचा कसून शोध सुरू आहे. तपासाच्या कारणास्तव पोलिसांनी आरोपींची नावे अद्याप जारी केली नाहीत मात्र तक्रारदारासोबत असलेला सहचालकही या प्रकरणात आरोपी असल्याने त्याने टीप दिल्यानंतर दरोड्याचा बनाव घडल्याचे स्पष्ट आहे.
यांनी केली गुन्ह्याची उकल
धुळे पोलिस अधीक्षक श्रीकांत धीवरे, अपर पोलिस अधीक्षक किशोर काळे यांच्या मार्गदर्शनाखाली धुळे तालुका पोलिस निरीक्षक धनंजय पाटील यांच्या नेतृत्वात एपीआय विवेक पवार, हवालदार नितीन मच्छिंद्र चव्हाण, हवालदार कुणाल पानपाटील, हवालदार उमेश पवार, हवालदार ललित खळगे, हवालदार सुमित ठाकुर, हवालदार विलास बागुल, हवालदार चेतन कंखरे, कॉन्स्टेबल विशाल पाटील, हवालदार किशोर खैरनार, कॉन्स्टेबल कुणाल शिंगाणे, कॉन्स्टेबल प्रतीक देसले, कॉन्स्टेबल रवींद्र सोनवणे, कॉन्स्टेबल गजेंद्र मुंडे, कॉन्स्टेबल सुरेंद्र खांडेकर, कॉन्स्टेबल प्रमोद पाटील, चालक रवींद्र राजपूत आदींनी गुन्ह्याची उकल केली.
