आयुष्यात गुरु असल्यास प्रत्येक दिवस हा उत्सव ठरेल : सोनुभाऊ मांडे

If you have a Guru in your life, every day will be a celebration : Sonubhau Mande भुसावळ (10 जुलै 2025) : प्रत्येकाच्या जीवनात गुरूंचे अत्यंत महत्त्व आहे गुरु आपल्या जीवनाला योग्य मार्गदर्शन देतात. गुरूंच्या सानिध्यात आपले व्यक्तिमत्व घडत असते. गरज असते ती श्रद्धेची. गुरुप्रती श्रद्धा असेल तर ज्ञानार्जन सहज सोपे होते त्यामुळे प्रत्येकाने आयुष्यात गुरु करणे आवश्यक आहे. गुरूंच्या सानिध्यामुळे आयुष्यातील प्रत्येक दिवस हा उत्सव होत असतो, असे विचार श्री संत ज्ञानेश्वर शिक्षण मंडळाचे अध्यक्ष सोनुभाऊ मांडे यांनी व्यक्त केले. निमित्त होते महाराणा प्रताप विद्यालय व अहिल्यादेवी कन्या विद्यालयात दोन्ही शाळा व शाळेतील पालक-शिक्षक संघ यांच्या संयुक्त विद्यमानाने आयोजित गुरुवंदना कार्यक्रमाचे.

विद्यार्थ्यांनी केले गुरूंना वंदन
गुरुपौर्णिमेनिमित्त विद्यार्थ्यांना आपल्या प्राचीन संस्कृतीचा संस्कार व्हावा या हेतूने दरवर्षी विद्यार्थी शिक्षकांना वंदन करून गुरु पौर्णिमेचा उत्सव साजरा करण्यात आला. सुरुवातीला मान्यवरांच्या शुभहस्ते सरस्वती माता तसेच महर्षी व्यासांच्या प्रतिमेचे पूजन करण्यात आले. दीपप्रज्वलन करून कार्यक्रमाचा शुभारंभ झाला. महाराणा प्रताप विद्यालयातील विद्यार्थ्यांनी अत्यंत सुंदर गुरुवंदना सादर करीत वातावरण मंत्रमुग्ध केले. विद्यार्थ्यांनी आपल्या शब्दरूपी मनोगतातून गुरूबद्दलचा आदर व्यक्त केला. वरद फेगडे, आदर्श कोकणे, जिगीषा निकम, आकांक्षा नाले इत्यादी विद्यार्थ्यांनी तर शिक्षकांमधून आशिष निरखे यांनी मनोगत मांडले.