धुळ्यातील एक कोटी 84 लाखांचे घबाड प्रकरण : आमदार खोतकरांचे स्वीय सहाय्यक किशोर पाटलांसह दोघांविरोधात गुन्हा
Dhule scam worth Rs 1.84 crore: Case filed against MLA Khotkar’s personal assistant Kishore Patil and two others धुळे (11 जुलै 2025) : धुळे जिल्ह्याच्या दौर्‍यावर आलेल्या 11 आमदारांच्या अंदाज समितीला देण्यासाठी मोठी रक्कम जमा करून धुळ्यातील गुलमोहोर रेस्ट हाऊसच्या 102 क्रमांकाच्या खोलीत ठेवण्यात आल्याचा दावा माजी आमदार अनिल गोटे यांनी केला होता. सुरूवातीला एन.सी.स्वरूपात दाखल प्रकरण न्यायालयात गेल्यानंतर आता आमदार अर्जुन खोतकर यांचे तत्कालीन स्वीय सहाय्यक किशोर पाटील व राजकुमार मोगले यांच्याविरोधात धुळे शहर पोलिसात विविध कलमांद्वारे गुन्हा दाखल करण्यात आला आहे. आता आरोपी व त्यांच्या भोवतालच्या लोकांवर काय कारवाई होते? याकडे धुळे जिल्ह्याचे लक्ष लागले आहे.
असे आहे नेमके प्रकरण
धुळे शहरातील गुलमोहर शासकीय विश्रामगृहाच्या 102 क्रमांकाच्या कक्षात तब्बल एक कोटी 84 लाख रुपयांची रोकड माजी आमदार अनिल गोटे यांच्या आंदोलनानंतर हस्तगत करण्यात आली होती. ही रक्कम विधिमंडळ अंदाज समिती सदस्यांना देण्यासाठी जमा केली असल्याचा गंभीर आरोप माजी आमदार गोटे यांनी केला होता. या पार्श्वभूमीवर पोलिसांनी तत्काळ गुन्हा दाखल करत तपास सुरू केला होता.
किशोर पाटील निलंबित
या प्रकरणात विधिमंडळ अंदाज समितीचे अध्यक्ष आमदार अर्जुन खोतकर यांचे स्वीय सहाय्यक किशोर पाटील यांना चौकशीसाठी ताब्यात घेण्यात आले व पाटील यांचे निलंबनही करण्यात आले.
11 जणांची पटली ओळख
घटनेच्या दिवशी रेस्ट हाऊस आवारात आलेल्या 11 जणांची ओळख पटवण्यात यश आले असून तीन गाड्यांचीही यंत्रणेने ओळख पटवली व पोलिसांच्या तीन पथकांनी धुळ्यासह नंदुरबारमधील शासकीय कार्यालयात जावून ‘त्या’ 11 जणांची ओळख पटवत त्यांचा जाब-जवाब नोंदवला होता. मुख्यमंत्री देवेंद्र फडणवीस यांनी या प्रकरणाच्या एसआयटी (विशेष तपास पथक) चौकशीची घोषणा केली होती.
सीजेएम ‘ऑर्डर’ला स्टे
पोलिस सूत्रांच्या माहितीनुसार, 10 जुलै 2025 च्या सीजेएम न्यायालयाच्या आदेशात केवळ भारतीय न्याय संहिता कलमांचा उल्लेख आहे. (मनी लाँडरिंग आणि एंटी करप्शन कायद्याचा उल्लेख नाही. ज्यांच्या तपासाचे अधिकार पोलिसांना नाही, असे पोलिसांतर्फे न्यायालयात कळवण्यात आले होते. सेशन कोर्टाने आधीच्या सीजेएम ऑर्डरला स्टे दिला आणि परत योग्य आणि स्पष्ट आदेशाकरिता सीजेएम यांना आदेश केला)
या कलमान्वये गुन्हा
धुळे शहर पोलिसात भारतीय न्याय संहितेच्या सीजेएम न्यायालयाने दिलेल्या कलमान्वये आरोपी किशोर पाटील व राजकुमार मोगले यांच्या विरोधात गुन्हा दाखल करण्यात आला.
308 खंडणी : एखाद्या व्यक्तीला इजा करण्याची भीती दाखवून किंवा इतर कोणत्याही प्रकारे दबाव आणून त्याच्याकडून जबरदस्तीने काही मालमत्ता, पैसे किंवा इतर मौल्यवान वस्तू घेण्याचा प्रयत्न करणे
233 : एखाद्या व्यक्तीला पुरावा खोटा आहे हे माहित असूनही, तो खरा आहे असे भासवून त्याचा वापर करणे किंवा करण्याचा प्रयत्न करणे
241 मध्ये पुरावा म्हणून सादर होण्यापासून रोखण्यासाठी कागदपत्रे नष्ट करणे, लपवणे किंवा बदलणे याबद्दल सांगितले आहे. जर कोणी जाणीवपूर्वक कोणताही कागदपत्र किंवा इलेक्ट्रॉनिक रेकॉर्ड नष्ट केला, लपवला किंवा त्यात बदल केला.
दरम्यान यापूर्वी दाखल असलेल्या एनसी गुन्हाचा तपास या नवीन गुन्ह्यात समाविष्ट करून तपास करण्यात येणार आहे. राज्यभराचे लक्ष लागून असलेल्या या गुन्ह्याचा तपास धुळ्याचे पोलिस अधीक्षक श्रीकांत धीवरे यांच्या मार्गदर्शनाखाली धुळे शहर पोलिस उपअधीक्षक राजकुमार उपासे करतील.
