पिंपरूळ आश्रमशाळा सुविधांपासून वंचित : विद्यार्थी पायी प्रांत कार्यालयात धडकले

काय घडले आश्रमशाळेत
पिंपरुड येथील पंडित दीनदयाल उपाध्याय अनुदानीत आश्रमशाळेत इयत्ता पहिली ते बारावीपर्यंत जवळपास 400 विद्यार्थी आहेत. यात विद्यार्थी व विद्यार्थिनी सोबत शिक्षण घेत आहे. या आश्रमशाळेत विद्यार्थ्यांना मूलभूत सुविधा त्यात निकृष्ट जेवण दिले जाते., जेवणाचे कोणतेही वेळा पत्रक नसते, तसेच शिक्षणासाठी लागणारे पुस्तके व साहित्य ही दिले जात नाही, निवासी शाळा असताना विद्यार्थ्यांना वर्ग खोल्या झोपवले जाते, त्याचप्रमाणे गणवेश सुद्धा दिलेला नाही, स्त्री पुरुष अधीक्षक सुद्धा या शाळेला नाही तर रात्री महिला रेक्टर सुद्धा नाही यासह अकरावी, बारावी तुकड्या बंद करायला सांगत संस्था अध्यक्ष धमक्या देत असतात. या सर्व बाबीला कंटाळून इयत्ता अकरावी व बारावीच्या विद्यार्थी व विद्यार्थिनी यांनी पायी चालत प्रांत कार्यालय गाठले.

यावेळी आदिवासी प्रकल्प अधिकारी अरुण पवार यांना ही बोलवण्यात आले. यावेळी संस्थेचे अध्यक्ष पांडुरंग सराफ व शिक्षक वर्ग याची ही उपस्थिती होती. विद्यार्थी यांनी आश्रम शाळेतील समस्यांचा पाढा प्रकल्प अधिकारी याच्या समोर वाचला. त्यानंतर प्रांताधिकारी बबनराव काकडे यांच्या दालनात प्रकल्प अधिकारी अरुण पवार, एपीआय रामेश्वर मोताळे, नायब तहसीलदार जगदीश गुरव, संस्थाध्यक्ष पांडुरंग सराफ, सामाजिक कार्यकर्ते शमिभा पाटील यांच्यात बैठक होवून विद्यार्थ्यांच्या समस्या सोडवण्यासाठी काय उपाय-योजना कराव्या लागतील याबाबत सविस्तर चर्चा झाली मात्र विद्यार्थ्यांच्या या पवित्रामुळे शाळेतील सोयी-सुविधांचे पितळ उघडे पडले.

दरम्यान, संस्थाचालक पांडुरंग सराफ यांची प्रतिक्रिया घेण्याचा प्रयत्न केला असता त्यांनी प्रतिक्रिया देण्यास नकार दिला.

संस्था चालकांना सुविधा पुरवण्याच्या सूचना करणार
पिंपरुड येथील पंडित दीनदयाळ उपाध्याय अनुदानित आश्रम शाळेतील सोयी-सुविधांबाबत विद्यार्थ्यांच्या तक्रारी प्राप्त झाल्या असून याची गांभीर्याने दखल घेतली आहे. या संदर्भात शाळेला भेट देऊन चौकशी केली जाईल व विद्यार्थ्यांना सोयी-सुविधा उपलब्ध करून देण्यासाठी संस्था चालक यांना सांगण्यात येईल, असे यावलचे आदिवासी प्रकल्प अधिकारी अरुण पवार म्हणाले.