गौताळा अभयारण्यात खून झालेला तरुण चाळीसगाव तालुक्याचा रहिवासी : मित्रानेच वादानंतर धडावेगळे केले शीर
कन्नड पोलिसांनी संशयावरून आरोपीला केली अटक ः कुर्‍हाडीने मित्रालाच संपवल्याचा प्रकार उघड
Kannada police unravel the mystery of the headless body: The murder was committed by a friend चाळीसगाव (13 सप्टेंबर 2025) : गौताळा अभयारण्यात अज्ञात तरुणाची हत्या करून मुंडके नसलेला मृतदेह टाकण्यात आला होता मात्र कन्नड पोलिसांनी अत्यंत बारकाईने या गुन्ह्याचा तपास करीत आरोपी असलेल्या मित्राला बेड्या ठोकल्या तर मयत हा चाळीसगाव तालुक्यातील शिंदी गावातील रहिवासी असल्याचे समोर आले आहे. निखील हिरामण सूर्यवंशी (रा.शिंदी, ता.चाळीसगाव) असे खून झालेल्या तरुणाचे तर श्रावण ज्ञानेश्वर धनगर असे अटकेतील आरोपीचे नाव आहे.
काय घडले अभयारण्यात
जळगाव-छत्रपती संभाजीनगर सीमेवरील कन्नड ग्रामीण पोलिस स्टेशनच्या हद्दीतील गौताळा अभयारण्यामध्ये सनसेट पॉइंटजवळ घनदाट जंगलात पोलिसांना एक धड नसलेला मृतदेह आढळला होता तर काही अंतरावर मृताची कवटीदेखील मिळाली. पोलिसांनी सापडलेल्या कवटीवरील जॉ फॅक्चर क्लिप वरून तपास सुरू केला.या क्लिपच्या आधारे पोलिसांनी मृतदेहाची ओळख पटवली. हा मृतदेह निखिल हिरामण सूर्यवंशी (रा. शिंदी, ता. चाळीसगाव) या तरुणाचा असल्याचे स्पष्ट झाले. तब्बल 38 रुग्णालयांत तपास केल्यावर जुलै 2023 मध्ये घोटीच्या एसएमबीटी रुग्णालयात निखिलच्या जबड्याचे ऑपरेशन झाल्याचे स्पष्ट झाले.
मित्रावर संशय अन् उघडकीस आला गुन्हा
ओळख पटल्यानंतर पोलिसांनी निखीलच्या सर्व मित्रांची चौकशी केली. सर्व मित्र चौकशीसाठी समोर आले पण त्याचा जवळचा मित्र श्रावण ज्ञानेश्वर धनगर मात्र पोलिसांपासून दूर पळत असल्याने संशय बळावला व त्याला ताब्यात घेत कसून चौकशी केल्यानंतर त्याने निखीलच्या खुनाची कबुली दिली.
वार चुकवला अन् मित्राला संपवले
श्रावणने पोलिसांना दिलेल्या माहितीनुसार, 26 ऑगस्ट रोजी निखील सूर्यवंशी याने श्रावणाला भेटायला बोलावले. सायगावमार्गे ते दोघे दुचाकीवरून सनसेट पॉइंटकडे गेले. तिथे गेल्यानंतर निखिलने अचानक श्रावणवर हल्ला करण्याचा प्रयत्न केला.
तुझ्यामुळे बदनामी होत असल्यानेव लग्न जमत नसल्याने तुझा जीव घ्यायचा आहे, असे म्हणत त्याने कुर्‍हाडीने श्रावणवर वार केला मात्र श्रावणने तो वार चुकवला आणि निखीलच्या गुप्तांगावर लाथ मारली. निखील खाली पडताच, त्याच कुर्‍हाडीने श्रावणने त्याचे शीर धडापासून वेगळे केले.
यांनी उघडकीस आणला गुन्हा
पोलिस अधीक्षक डॉ.विनयकुमार राठोड, अपर पोलिस अधीक्षक अन्नपूर्णा सिंह यांच्या मार्गदर्शनाखाली स्थानिक गुन्हे शाखेचे पोलिस निरीक्षक विजयसिंह राजपूत, पोलिस उपअधीक्षक डॉ. दिनेशकुमार कोल्हे, पोलिस निरीक्षक विजयसिंह राजपूत, सहायक निरीक्षक संतोष मिसळे, पवन इंगळे, अंमलदार प्रमोद पाटील, वाल्मीक निकम, विठ्ठल डोके एपीआय पवार, पीएसआय जाधव, पोलिस हेडकॉन्स्टेबल अजय मोतींगे, बाबासाहेब धनुरे, प्रदीप पवार, सुशील कुमार बागुल, धीरज चव्हाण, शिवदास बोराडे, हर्षवर्धन काळे, दिलवर सिंग वसावे, संदीप कनकुटे या पथकाने खुनाच्या गुन्ह्याचा उलगडा केला.
