Mohammad, who helped terrorists in Pahalgam attack, arrested नवी दिल्ली (24 सप्टेंबर 2025) : जम्मू काश्मीरातील पहलगाममध्ये पर्यटकांवर भ्याड हल्ला करण्यात आला होता. हल्ला करणार्‍या दहशतवाद्यांना मदत करणार्‍या मोहम्मद युसुफ कटारियाला अटक करण्यात लष्कराला यश आले. आरोपी दक्षिण कश्मीरातील असून त्याने 22 एप्रिलला लश्कर-ए-तैयबाच्या दहशतवाद्यांना मदत केली होती. श्रीनगर पोलिसांनी त्याला अटक करून न्यायालयात हजर केल्यानंतर त्याची न्यायालयीन कोठडीत रवानगी करण्यातआली.
हत्येत सहभागाचा आरोप
मोहम्मद यूसुफ कटारिया हा लश्कर-ए-तैयबाचा (टीआरएफ) दहशतवादी असून त्याच्यावर बैसरन खोर्‍यात 26 जणांच्या हत्येत सामील असलेल्या दहशतवाद्यांना मदत केल्याचा गंभीर आरोप आहे.
पोलिसांनी दिलेल्या माहितीनुसार, ऑपरेशन महादेव दरम्यान जप्त केलेल्या शस्त्रास्त्रे आणि इतर सामग्रीच्या विश्लेषणानंतर कटारियाला अटक करण्यात आली. दहशतवाद्यांच्या हालचालींना मदत आणि सुविधा पुरवण्यात कटारियाची महत्त्वाची भूमिका होती. महत्वाचे म्हणजे, दक्षिण काश्मीरमधील दहशतवादी नेटवर्कविरुद्धच्या कारवाईतील हे मोठे यश असल्याचे अधिकार्‍यांनी म्हटले आहे.
कटारियाच्या सहकार्‍यांची ओळख पटवण्यासंदर्भात आणि लश्कर-ए-तैयबाशी (टीआरएफ) संबंधित दहशतवादी नेटवर्क उद्ध्वस्त करण्यासाठी पोलिसांचा तपास सुरू आहे तसेच जम्मू-काश्मीरमध्ये शांतता प्रस्थापित करण्यासाठी आणि दहशतवादी मॉड्यूल उद्ध्वस्त करण्यासाठी आपण कटिबद्ध असल्याचेही पोलिसांनी म्हटले आहे.
कोण आहे कटारिया? –
मोहम्मद युसुफ कटारिया पहलगाम येथे कंत्राटी तत्वावर काम करत होता आणि स्थानिक मुलांना शिकवत होता. काही महिन्यांपूर्वीच तो दहशतवाद्यांच्या संपर्कात आला होता आणि त्यांना मदत करू लागला होता.
