गोविंद पानसरे हत्या प्रकरण ; सर्व आरोपींची जामिनावर सुटका
फेब्रुवारी 2015 मध्ये हत्या मात्र तपास संपेना
Govind Pansare murder case; All accused released on bail मुंबई (14 ऑक्टोबर 2025) : कॉमे्रड गोविंद पानसरे हत्या प्रकरणातील उर्वरीत तीन आरोपींनाही मुंबई उच्च न्यालयाच्या कोल्हापूर सर्किट बेंचने मंगळवारी जामीन मंजूर केला. यापूर्वी 12 पैकी 9 आरोपींना यापूर्वीच जामीन मंजूर होता तर आता उर्वरीत आरोपींना जामीन मंजूर करण्यात आला. दरम्यान, या प्रकरणाचा अद्यापही तपास सुरूच आहे.
हत्येला दहा वर्ष पूर्ण
कम्युनिस्ट पक्षाचे नेते कॉम्रेड गोविंद पानसरे यांच्या हत्येला सुमारे 10 वर्षे पूर्ण झाली आहेत. पानसरे 16 फेब्रुवारी 2015 रोजी सकाळी मॉर्निंग वॉकला गेल्यानंतर कोल्हापुरातील त्यांच्या निवासस्थानापासून जवळच दोन व्यक्तींनी त्यांना गोळ्या घातल्या होत्या. त्यात ते गंभीर जखमी झाले होते. त्यांना तातडीने मुंबईच्या ब्रीच कँडी रुग्णालयात दाखल करण्यात आले. तिथे 20 फेब्रुवारी रोजी त्यांचा मृत्यू झाला. या हत्याकांडामुळे राज्यासह अवघ्या देशभरात एकच खळबळ माजली होती. त्यानंतर तपास यंत्रणांनी या हत्येप्रकरणी 12 आरोपींना अटक केलीपण आज अखेर या सर्वच आरोपींना जामीन मंजूर झाला.
डॉक्टर वीरेंद्रसिंह तावडे हिंदू जनजागृतीचा सदस्य
आज जामीन मिळालेला डॉ.वीरेंद्रसिंह तावडे हा हिंदू जनजागृतीचा सदस्य आहे. एसआयटीने 2016 मध्ये त्याच्या मुसक्या आवळल्या होत्या. तो पानसरे यांच्या हत्येचा मास्टरमाईंड असल्याचा दावा दोषारोपपत्रात करण्यात आहे. दुसरीकडे, अमोल काळे याला कर्नाटक पोलिसांनी ज्येष्ठ पत्रकार गौरी लंकेश हत्या प्रकरणात अटक करण्यात आली होती. त्यानंतर त्याचा संबंध गोविंद पानसरे यांच्या हत्येशी असल्याचे निष्पन्न झाले होते. त्यानुसार, एसआयटीने त्याला अटक केली होती. 2018 मध्ये त्याच्या कोठडीची मागणी करताना पोलिस म्हणाले होते, पानसरे यांच्या हत्येसाठी दोन गावठी बनावटीच्या पिस्तुलांचा वापर करण्यात आला होता. या दोनपैकी एका पिस्तूलाचा वापर दाभोलकर व दुसर्‍या पिस्तूलाचा वापर कलबुर्गी यांच्या हत्येसाठी करण्यात आला.
दरम्यान, एसआयटीने शरद कळसकरला 2019 मध्ये अटक केली होती. त्याच्यावर बेळगावमध्ये गोविंद पानसरे यांच्या हत्येचा कट रचण्यासाठी ज्या मीटिंग झाल्या त्यात कळसकर उपस्थित होता, असा आरोप आहे.
