Four thousand rupees bribe : Sub-divisional officer from Amalner caught by Jalgaon ACB अमळनेर (16 ऑक्टोबर 2025) : अमळने ग्रामीण पाणीपुरवठा उपविभागाचे उपविभागीय अधिकारी दिलीप दत्तात्रय पाटील यांना तडजोडीअंती चार हजारांची लाच स्वीकारताना जळगाव एसीबीने अटक केल्याने लाचखोरांच्या वर्तुळात प्रचंड खळबळ उडाली आहे. सलग दोन दिवसांपासून सुरू असलेल्या एसीबीच्या कारवाईचा लाचखोरांनी जिल्ह्यात धसका घेतला आहे.
असे आहे लाच प्रकरण
तक्रारदार हे खाजगी ठेकेदार असून त्यांनी चोपडा तालुक्यातील मौजे व मांजरे हिंगोणे या ठिकाणी एकूण तीन लाख 55 हजार रुपयांचे सांडपाणी व घनकचरा व्यवस्थापनाचे काम पूर्ण केले आहे. काम पूर्ण झाल्यानंतर बिलाची प्रक्रिया सुरू करण्यासाठी ठेकेदार अमळनेर येथील जिल्हा परिषद ग्रामीण पाणीपुरवठा उपविभाग कार्यालयात 13 ऑक्टोबर रोजी गेल्यानंतर उपविभागीय अधिकारी पाटील यांनी अहवाल तयार करून देण्यासाठी दोन टक्के म्हणजेच सात हजारांची लाच मागणी केली.
पडताळणीत लाच मागणी उघड
तक्रारदाराला लाच द्यायची नसल्याने त्यांनी जळगाव लाचलुचपत प्रतिबंधक विभागाकडे तक्रार दिल्यानंतर पडताळणीदरम्यान चार हजार रुपये मागणी झाल्याचे सिद्ध झाल्यानंतर सापळा रचण्यात आला व बुधवार, 15 रोजी अधिकारी पाटील यांना लाच स्वीकारताच अटक करण्यात आली.
यांनी केला सापळा यशस्वी
हा सापळा जळगाव एसीबीचे डॅशिंग पोलिस उपअधीक्षक योगेश ठाकूर यांच्या नेतृत्वात नंदुरबार पोलिस निरीक्षक रेशमा अवतारे, एएसआय विलास पाटील, हवालदार नरेंद्र पाटील, नाईक हेमंतकुमार महाले (नंदुरबार), कॉन्स्टेबल राकेश दुसाने आदींच्या पथकाने यशस्वी केला.
