मुक्ताईनगर पोलिसांची मोठी कामगिरी : घरफोड्यांची उकल ; खामगावातील आरोपींना बेड्या
Muktainagar police’s big achievement : house burglary solved; Khamgaon accused arrested मुक्ताईनगर (15 ऑक्टोबर 2025) : मुक्ताईनगर शहरात झालेल्या घरफोडी प्रकरणी खामगाव तालुक्यातील आरोपींना पोलिसांनी बेड्या ठोकत चोरी केलेल्या दोन वाहनांसह 94 हजार 500 रुपयांचे दागिणे व दहा हजारांची रोकड जप्त केली आहे. आरोपींना न्यायालयाने चार दिवसांची पोलिस कोठडी सुनावली आहे.
या आरोपींना अटक
प्रदीप हिवराळे (30), अतुल हिवराळे (30), रवी हिवराळे (40, सर्व रा.अंबिकापूर, ता.खामगाव, जि.बुलढाणा) असे अटकेतील आरोपींचे नाव आहे. शहरातील डॉ.आंबेडकर नगर व पंचायत समितीजवळ घरफोडी झाली होती तसेच घोडसगाव व मुक्ताईनगर येथून दोन दुचाकी चोरीला गेल्या होत्या. 7 व 8 ऑक्टोबर रोजी झालेल्या चोरी प्रकरणी गुन्हा दाखल करण्यात आला.
गोपनीय माहितीवरून आरोपी जाळ्यात
जळगाव पोलिस अधीक्षक महेश्वर रेड्डी यांच्या मार्गदर्शनाखाली पोलिस निरीक्षक आशिष अडसूळ यांच्या नेतृत्वात पोलिस उपनिरीक्षक नयन पाटील, हवालदार महेंद्र सुरवाडे, पोलिस हेड कॉन्स्टेबल अजय खंडेराव, पोलिस कॉन्स्टेबल रवींद्र धनगर, पोलिस कॉन्स्टेबल अमोल जाधव, पोलिस कॉन्स्टेबल अक्षय वाडे आदींच्या पथकाने बुलढाणा जिल्ह्यातील व खामगाव तालुक्यातील अंबिकापूर येथून त्रिकूटाला ताब्यात घेतले. आरोपींनी चोरीत वापरलेली चारचाकी डिझायर जप्त करण्यात आली.
