खून प्रकरणात बेशिस्तपणा भोवला : नंदुरबार पोलिस दलातील शिपाई चेतन चौधरी खात्यातून बडतर्फ
Indiscipline in murder case : Nandurbar Police Constable Chetan Chaudhary dismissed from service नंदुरबार (15 ऑक्टोबर 2025) : नंदुरबार शहरात 16 सप्टेंबर रोजी दोन युवकांमधील वादातून झालेल्या हल्ल्यात जयेश वळवी या तरुणाचा मृत्यू झाला होता. सूर्यकांत सुधाकर मराठे उर्फ भैय्या बोबड्या नावाच्या युवकाने त्याच्यावर चाकू हल्ला केला होता. ही घटना सीसीटीव्ही कॅमेर्‍यात कैद झाली होती. खून होत असताना नंदुरबार पोलिस दलातील कर्मचारी चेतन निंबाजी चौधरी उपस्थित असताना त्याचे वर्तन बेशिस्त व बेजवाबदारपणाचे असल्याने पोलिस दलावर टीकेची झोड उठली होती. यानंतर कर्मचार्‍याला निलंबित केल्यानंतर आता त्याला खात्यातून बडतर्फ करण्यात आल्याचे जिल्हा पोलिस अधीक्षक श्रवण दत्त यांनी कळवले आहे.
काय आहे नेमके प्रकरण?
नंदुरबारच्या उपनगर हद्दीत जय वळवी या तरुणावर सूर्यकांत मराठे या आरोपीने चाकूहल्ला केला होता. या हल्ल्यात जय वळवीचा मृत्यू झाल्यानंतर आदिवासी समाजाच्या भावना दुखावल्या. या वादात सहभागी असलेल्यावर तसेच जय वळवीच्या मृत्यूला कारणीभूत ठरणार्‍यांवर कठोर कारवाई करण्याच्या मागणीसाठी नंदुरबार शहर बंद ठेवण्यात आले व आदिवासी बांधव आंदोलनासाठी रस्त्यावर उतरले मात्र मोर्चा जिल्हाधिकारी कार्यालयाजवळ पोहोचताच आंदोलनाला हिंसक वळण लागले होते.
‘त्या’ कर्मचार्‍याची खात्यातून बडतर्फी
जय वळवी या तरुणाचा खून होत असताना संशयीतासोबत तळोदा पोलिस ठाण्यातील कर्मचारी चेतन निंबाजी चौधरी उपस्थित होता. त्याने तत्काळ घटनेची माहिती पोलिसांना देणे गरजेचे होते मात्र तसे घडले नाही. या प्रकारामुळे पोलिस दलाची प्रतिमा मलीन झाल्याने या कर्मचार्‍याला सुरूवातीला निलंबित केल्यानंतर जिल्हा पोलिस अधीक्षकांनी चौकशीअंती त्यास खात्यातून बडतर्फ केले आहे. शिस्तीच्या खात्यात कर्मचार्‍यांकडून अशा पद्धत्तीचे गैरकृत्य व नियमबाह्य वर्तन कदापि सहन केले जाणार नाही, असा इशारा जिल्हा पोलिस अधीक्षक श्रवण दत्त यांनी दिला आहे.
