जालना महानगरपालिकेच्या आयुक्तांना दहा लाखांची लाच घेताना पकडले : कंत्राटदारांनी एसीबी कार्यालयाबाहेर फोडले फटाके
Jalna Municipal Commissioner caught taking bribe of Rs 10 lakhs : Contractors burst crackers outside ACB office जालना (16 ऑक्टोबर 2025) : बांधकाम विभागातील बिल देण्याच्या बदल्यात कंत्राटदाराकडून दब्बल 10 लाख रुपयांची लाच घेताना जालना शहर महानगरपालिकेच्या आयुक्तांना पकडण्यात आल्यानंतर लाचखोरांच्या वर्तुळात प्रचंड खळबळ उडाली. संतोष खांडेकर असे अटकेतील आरोपीचे नाव आहे. या कारवाईनंतर त्रस्त कंत्राटदारांनी एसीबीच्या कार्यालयाबाहेर फटाके फोडून रोष व्यक्त केला. मनपा आयुक्तांच्या शासकीय निवासस्थानी गुरुवारी सायंकाळी ही कारवाई करण्यात आली.
लाच घेताना अटक
छत्रपती संभाजीनगर लाचलुचपत प्रतिबंधक विभागाच्या अधीक्षक माधुरी केदार कांगणे यांनी सांगितले की, तक्रारदार बांधकाम कंत्राटदाराकडून केलेल्या कामाचे देयक काढण्यासाठी मनपा आयुक्त संतोष खांडेकर यांनी मोठी रक्कम लाच म्हणून मागितली. त्यातील 10 लाखांवर तडजोड झाली. त्या संदर्भातील तक्रार नोंद झाल्यानंतर खांडेकर 10 लाख घेताना लाचलुचपत प्रतिबंधक विभागाच्या पथकाने लावलेल्या सापळ्यात अडकले.
संतोष खांडेकर हे जालना महापालिकेचे आयुक्त आहेत. याआधी जालना नगर परिषदेत ही त्यांनी मुख्यधिकारी म्हणून काम पाहिले आहे. प्रमोशनवर ते परत जालना महापालिकेत आयुक्त म्हणून आले आहेत. जालना महापालिकेच्या इमारतीचे सध्या काम सुरू आहे. एका ठेकेदाराला देण्यासाठी त्यांनी एक कोटींची लाच मागितल्याची प्राथमिक माहिती समोर आली आहे. या लाचेचा पहिला हफ्ता म्हणून 10 लाख देण्याचे निश्चित झाल्यानंतर त्यांना पकडण्यात आले आहे.
