जन्मदात्याचा खून आरोपी मुलाला जन्मठेपेची शिक्षा : भुसावळ सत्र न्यायालयाचा निकाल
Life imprisonment for son accused of murdering his biological father : Bhusawal Sessions Court verdict भुसावळ (18 ऑक्टोबर 2025) : उडीदाची भाजी का केली? या वादातून मुलाने वडिलांचा खून केला होता. जळगाव जिल्ह्यातील रावेर तालुक्यातील पाल शिवारात खुनाची घटन घडली होती. भुसावळ अतिरीक्त सत्र न्यायालयात खून खटल्याची सुनावणी झाल्यानंतर आरोपी मुलाला न्यायालयाने जन्मठेपेची शिक्षा सुनावली. दिनेश उर्फ शिवा अनाज्या बारेला असे शिक्षा सुनावलेल्या आरोपीचे नाव आहे.
काय आहे नेमके प्रकरण ?
बनाबाई नरसिंग बारेला (32) या खून प्रकरणात फिर्यादी असून त्यांचे पती नरसिंग बारेला हे पुनमचंद पवार यांच्या शेतात राहत होते आणि शेतजमीन निम्म्या हिश्श्याने कसत होते. शेजारीच बनाबाई यांचे आई-वडील गीताबाई आणि अनाज्या बारेला राहत होते. बनाबाई यांचे तीन भाऊ असून त्यापैकी मोठे दोन भाऊ अंगारसिंग आणि सुनील हे ऊस तोडणीच्या कामासाठी बाहेरगावी गेले होते. तिसरा भाऊ दिनेश उर्फ शिवा हा त्याच्या तीन मुलांसह – लक्ष्मी, कृष्णा आणि भोला – शेजारी राहत होता. दिनेश हा कोणतेही कामधंदे करत नव्हता आणि त्याने दोन-तीन वर्षांपूर्वी आपल्या पत्नी गुड्डी हिला मारहाण करून माहेरी हाकलले होते. घटनेच्या दिवशी रात्रीच्या वेळी किरकोळ कारणावरून त्याचा वडिलांशी वाद झाला. उडिदाची दाळीची भाजी खाण्याच्या मुद्यावरून संतापलेल्या दिनेशने रागाच्या भरात वडिलांवर हल्ला चढवला आणि त्यांच्या डोक्यात गंभीर जखम केल्याने त्यांचा जागीच मृत्यू झाला. ही घटना 29 नोव्हेंबर 2021 रोजी पाल शिवारातील शेत गट क्रमांक 271 मध्ये घडली.
दहा जणांची साक्ष ठरली महत्त्वाची
खून प्रकरणी गुन्हा दाखल झाल्यानंतर खटल्याची सुनावणी अतिरीक्त सत्र न्यायालयात सुनावणी चालली. या खटल्यात आरोपी बहीण, आदई व त्याचा दहा वर्षांपासूनचा मित्र यांची साक्ष महत्त्वाची ठरली. सहाय्यक सरकारी वकील मोहन देशपांडे यांनी प्रभावीपणे बाजू मांडून दोषारोप सिद्ध केला. तपासात पैरवी अधिकारी कांतीलाल कोळी तर केस वॉच म्हणून कॉन्स्टेबल मुकेश मेढे यांनी काम पाहिले.
