कर्मभूमी एक्स्प्रेसमधून खाली पडताच दोघा युवकांचा मृत्यू, एक गंभीर ; नाशिकजवळील घटना
Two youths die after falling off Karmabhoomi Express, one critically injured; Incident near Nashik नाशिक (19 ऑक्टोबर 2025) : मुंबई लोकमान्य टिळक टर्मिनसहून बिहारमधील रक्सौलकडे जाणार्‍या कर्मभूमी एक्स्प्रेस (गाडी क्रमांक 12546) मधून तीन युवक खाली पडल्यानंतर त्यातीील दोन युवकांचा जागीच मृत्यू झाला तर एक युवक गंभीर जखमी झाला.
गर्दीमुळे घडली घटना
12546 कर्मभूमी एक्स्प्रेस ही शनिवारी लोकमान्य टर्मिनसहून बिहारमधील रक्सौलकडे निघाल्यानंतर शनिवारी रात्री 8 वाजून 18 मिनिटांनी ही रेल्वेगाडी नाशिक रोड रेल्वे स्थानकावर न थांबता पुढे गेली. ओढा रेल्वे स्थानकाचे स्टेशन प्रबंधक आकाश यांनी नाशिक रोड रेल्वे प्रशासनाला तीन युवक रेल्वेतून खाली पडल्याची माहिती दिली. माहिती मिळताच नाशिक रोड पोलिस ठाण्याचे वरिष्ठ निरीक्षक जितेंद्र सपकाळे यांच्या मार्गदर्शनाखाली पोलिसांनी घटनास्थळी धाव घेतली. तिथे दोन युवक मृतावस्थेत तर एक युवक गंभीर जखमी अवस्थेत आढळला. जखमी युवकाला तातडीने जिल्हा रुग्णालयात दाखल करण्यात आले. ही दुर्घटना जेल रोडवरील हनुमान मंदिराजवळील ढिकलेनगर परिसरात किलोमीटर 190/1 ते 190/3 दरम्यान घडली.
गावाकडे निघालेल्या तरुणांवर क्रुर काळाचा घाला
प्राथमिक अंदाजानुसार, दिवाळी सणाच्या निमित्ताने उत्तर भारताकडे जाणार्‍या गाड्यांमध्ये मोठी गर्दी आहे. यामुळे काही प्रवासी रेल्वे डब्याच्या दरवाजाजवळ उभे राहतात. सदरील अपघाग्रस्त युवक देखील दरवाजाजवळ थांबले असावे आणि त्यांचा तोल जाऊन ते खाली पडले असावेत. हे तिघे युवक मुंबईत काम करणारे असून दिवाळीसाठी आपल्या गावी बिहारला जात असल्याची शक्यता पोलिसांनी वर्तवली आहे.
दरम्यान, मृत व जखमी युवकांची ओळख अद्याप पटलेली नाही. , दिवाळी आणि छठनिमित्त उत्तर प्रदेश, बिहार आणि झारखंड येथे जाणार्‍या प्रवाशांची मोठी गर्दी रेल्वे स्थानकावर दिसून येत आहे. लोकमान्य टिळक रेल्वे स्थानकापासून ते देशभरातील इतर शहरांमध्ये जाणार्‍या प्रवाशांची मोठी गर्दी दिसून येत आहे. बिहार, उत्तर प्रदेशकडे जाणार्‍या गाड्या पकडण्यासाठी प्रवाशांच्या लांब रांगा लागत आहेत. या अपघातामुळे पुन्हा एकदा रेल्वे सुरक्षेवर प्रश्नचिन्ह उपस्थित होत आहे.
