Four people died in a massive fire नवी मुंबई (21 ऑक्टोबर 2025) : नवी मुंबईच्या वाशी परिसरातील सेक्टर 14 मधील एम. जी. कॉम्प्लेक्समधील रहेजा रेसिडन्सी सोसायटीत मध्यरात्री भीषण आग लागल्याने त्यात होरपळून चौघांचा मृत्यू झाला. मृतांमध्ये सहा वर्षांची चिमुरडी आणि एका 84 वर्षीय आजीचा समावेश असून दहा जण आगीत भाजले गेले आहेत.
शॉर्ट सर्किटने आगीचा अंदाज
मंगळवारी मध्यरात्री 12.40 वाजेच्या सुमारास इमारतीच्या दहाव्या मजल्यावर शॉर्टसर्किटमुळे आग लागली. काही क्षणातच आगीने 11 व 12 व्या मजल्यावरही भीषण स्वरूप धारण केले.
अग्निशमन दलाची धाव
आगीची माहिती मिळताच वाशी, नेरुळ, ऐरोली आणि कोपरखैरणे अग्निशमन दलाच्या गाड्या तात्काळ घटनास्थळी दाखल झाल्या. अग्निशमन दलाने जवळपास तीन तासांच्या प्रयत्नानंतर आग नियंत्रणात आणली. धुरामुळे संपूर्ण इमारत गुदमरून गेल्याने रहिवाशांना श्वास घेणे अवघड झाले होते. काहींना बचावासाठी क्रेन आणि जिन्यांच्या सहाय्याने बाहेर काढण्यात आले. वाशी अग्निशमन विभागाचे अधिकारी म्हणाले की, प्राथमिक तपासात शॉर्टसर्किटमुळे आग लागल्याचं दिसत आहे. मात्र, नेमकं कारण समजण्यासाठी तांत्रिक तपास सुरू आहे.
या दुर्घटनेत वेदिका सुंदर बालकृष्णन (6), कमला हिरल जैन (84), सुंदर बालकृष्णन (44), पुजा राजन (39) यांचा मृत्यू झाला तर 10 जण जखमी असून त्यांना हिरानंदानी रुग्णालय आणि एमजीएम रुग्णालयात दाखल करण्यात आले आहे. जखमींपैकी काहींची प्रकृती गंभीर असल्याची माहिती वैद्यकीय सूत्रांनी दिली आहे.
