Former Chalisgaon MLA Rajiv Deshmukh passes away due to heart attack चाळीसगाव (21 ऑक्टोबर 2025) : चाळीसगाव विधानसभा मतदारसंघाचे माजी आमदार आणि राष्ट्रवादी काँग्रेस (शरदचंद्र पवार गट) पक्षाचे प्रदेश उपाध्यक्ष राजीव देशमुख यांचे मंगळवार, 21 रोजी सकाळी हृदयविकाराने निधन झाले. त्यांच्या अकाली निधनामुळे चाळीसगावसह संपूर्ण जळगाव जिल्ह्याच्या राजकारणात मोठी पोकळी निर्माण झाली आहे.
दृरदृष्टीचे नेते म्हणून ओळख
राजीव देशमुख यांनी 2009 ते 2014 या कालावधीत चाळीसगाव विधानसभा मतदारसंघाचे आमदार म्हणून प्रतिनिधित्व केले. आमदार म्हणून त्यांनी चाळीसगाव आणि परिसरातील पायाभूत सुविधांच्या विकासासाठी महत्त्वपूर्ण काम केले. आमदारकी पूर्वी त्यांनी चाळीसगाव नगर परिषदेचे नगराध्यक्ष म्हणूनही आपल्या कामाची छाप सोडली होती. राजकीय वर्तुळात अत्यंत संयमी आणि दूरदृष्टीचे नेते म्हणून त्यांची ओळख होती. राष्ट्रवादी काँग्रेस (शरद पवार गट) पक्षाच्या प्रदेश नेतृत्वात ते उपाध्यक्ष पदावर कार्यरत होते.
तालुक्याने कणखर नेतृत्व गमावले
2014 आणि 2019 च्या विधानसभा निवडणुकांमध्ये त्यांना पराभवाला सामोरे जावे लागले असले तरी, कार्यकर्त्यांमध्ये त्यांचा प्रभाव कायम होता. राजीव देशमुख यांच्या निधनामुळे चाळीसगावसह संपूर्ण उत्तर महाराष्ट्रात शोकाची लाट पसरली आहे. विविध पक्षातील नेत्यांनी, पदाधिकार्‍यांनी आणि कार्यकर्त्यांनी त्यांच्या निधनाबद्दल तीव्र दुःख व्यक्त केले आहे. त्यांच्या जाण्याने केवळ राष्ट्रवादी पक्षाचेच नव्हे, तर चाळीसगावच्या सर्वपक्षीय राजकारणाने एक अनुभवी आणि कणखर नेतृत्व गमावले आहे.
चाळीसगावचा राज गड पोरका : आमदार मंगेश चव्हाण
चाळीसगाव मतदारसंघाचे माजी आमदार व राष्ट्रवादी काँग्रेस पक्षाचे प्रदेश उपाध्यक्ष राजीव दादा देशमुख यांच्या अकस्मात निधनाची बातमी अत्यंत दुःखद आहे. ते अत्यवस्थ असल्याची बातमी कळताच मी तत्काळ रुग्णालयात दाखल झालो होतो, मात्र रुग्णालयात शर्थीचे प्रयत्न करून देखील त्यांना वाचविण्यात यश मिळाले नाही याचे दुःख मनात आहे. मी राजकारणात येण्याच्या अगोदरपासून माझे व त्यांचे अनेक वर्षांपासून राजकारणा पलीकडील मैत्रीचे सबंध होते, नंतर राजकीय क्षेत्रात काही वेळा त्यांच्याशी निवडणुकीच्या निमित्ताने सामना झाला पण एका मर्यादेच्या पलीकडे त्यांनी कधीही टीका केली नाही किंवा वैमनस्य मनात ठेवले नाही. राजकारणात अशी माणसे खूप कमी असून राजीवदादा त्याचे एक मूर्तिमंत उदाहरण म्हणावे लागेल, असे आमदार मंगेशदादा चव्हाण म्हणाले.
समाजाभिमुख नेतृत्व हरपले
दादांच्या जाण्याने चाळीसगाव तालुका आणि जिल्ह्याच्या राजकीय, सामाजिक क्षेत्रात मोठी पोकळी निर्माण झाली आहे. कै अनिलदादा देशमुख व राजीव दादा देशमुख यांच्या जाण्याने त्यांचे निवासस्थान असलेले चाळीसगावचा राजगड आज पोरका झाला आहे. आपले वडील, माजी नगराध्यक्ष स्व. अनिलदादा देशमुख यांच्या लोकसेवेचा वारसा राजीवदादांनी अत्यंत प्रामाणिकपणे पुढे नेला. त्यांच्या जाण्याने एक संवेदनशील, सर्वस्पर्शी आणि समाजाभिमुख नेतृत्व हरपले आहे. दादांनी चाळीसगाव मतदारसंघात लोकसेवेचा दीप प्रज्वलित ठेवला; त्यांच्या कार्याची परंपरा अनेकांना प्रेरणा देणारी ठरेल, असेही आमदार मंगेश रमेश चव्हाण यांनी कळवले आहे.
